8 sentyabr kuni yurtimizda ob-havo qanday bo‘lishi haqida O‘zgidromet rasmiy axborot berdi. Ma’lumotlarga ko‘ra, mamlakatning ko‘plab hududlarida osmon biroz bulutli va o‘zgaruvchan bo‘lishi kutilmoqda, ammo asosiy qismida yog‘ingarchilik kuzatilmaydi.
Toshkent shahrida havo nisbatan iliq va qulay bo‘lishi aytiladi. Shamol sharqdan sekundiga 3–8 metr tezlikda esadi. Harorat kechasi 18–20 daraja, kunduzi esa 30–32 daraja atrofida bo‘lishi kutilmoqda.
Qoraqalpog‘iston Respublikasi va Xorazm viloyatida ham havo asosan musaffo, vaqt-vaqti bilan bulutlar ko‘rinadi. Yomg‘ir kuzatilmaydi. Shamol sharqdan 7–12 m/s tezlikda esadi. Harorat kechasi 13–18 daraja, kunduzi esa 27–32 daraja oralig‘ida bo‘ladi.
Buxoro va Navoiy viloyatlarida havo kunduz iliq, kechasi salqin kechishi aytilmoqda. Shamol o‘rtacha kuchda bo‘lib, harorat kechasi 15–20 daraja, kunduzi esa 30–35 darajagacha ko‘tariladi.
Toshkent, Sirdaryo, Jizzax va Samarqand viloyatlarida ham xuddi shunday vaziyat kuzatiladi: osmon biroz bulutli, yomg‘ir kutilmaydi. Harorat kechasi 15–20 daraja, kunduzi esa 30–35 daraja atrofida bo‘ladi.
Qashqadaryo va Surxondaryo viloyatlarida esa nisbatan issiq ob-havo kutilmoqda. Shamol sharqdan sekundiga 7–12 metr tezlikda esadi. Harorat kechasi 17–22 daraja, kunduzi esa 33–38 darajagacha ko‘tarilishi mumkin.
Andijon, Namangan va Farg‘ona viloyatlarida shamol ba’zi joylarda kuchayishi mumkin. Uning tezligi 13–18 m/s gacha yetishi ehtimol qilinmoqda. Havo asosan bulutli, yog‘ingarchiliksiz bo‘ladi. Harorat kechasi 15–20 daraja, kunduzi 30–35 daraja atrofida.
Respublikaning tog‘li hududlarida esa kunning ikkinchi yarmida qisqa muddatli yomg‘ir yog‘ishi va momaqaldiroq bo‘lishi ehtimoldan xoli emas. Ayniqsa, Toshkent viloyati va Farg‘ona vodiysidagi ayrim joylarda bunday holat qayd etilishi mumkin. Harorat kechasi 12–17 daraja, kunduzi esa 20–25 daraja bo‘lishi kutilmoqda.
Mutasaddilar aholini ob-havo sharoitidan kelib chiqib, kunduzgi issiqda ehtiyot bo‘lishga va kechki salqinda tana sog‘ligini asrashga chaqirmoqda.
“Zamin”ni Telegramʻda oʻqing!
