O‘zbekistonda jarima ballari qoidabuzarliklarni 41% ga kamaytirdi

O‘zbekistonda jarima ballari tizimi joriy etilgach, haydovchilar tomonidan yo‘l harakati qoidalarining buzilishi 41% ga kamaydi, deb xabar berdi IIV Yo‘l harakati xavfsizligi xizmati.

Ball tizimi 2024 yil 1 iyundan kuchga kirgan. Dastlabki uch oyda 69 mingga yaqin haydovchi jarima bali oldi. Ularning 63,9 ming nafari 0,5 dan 1 gacha, 4976 nafari ikki ballgacha, 189 nafari esa uch ball oldi.

Shuningdek, 14 nafar haydovchiga 4 ball, 4 nafariga esa 5 ball qo‘llanilgan. Shu bilan birga, 9,3 million haydovchi umuman jarima bali olmagan. Bu holat tartib-intizom oshganidan dalolat beradi.

2024 yil yozida qayd etilgan qoidabuzarliklar soni 285 ming bo‘lgan bo‘lsa, joriy yilning ayni shu davrida bu ko‘rsatkich 167 mingtaga tushdi. Yo‘l-transport hodisalari esa uchdan birga kamayib, 338 taga yetgan.