Hukumat qarori bilan «Yoshlarni xorijiy tillarni o‘quv markazlarida o‘rganish xarajatlarini qisman qoplash uchun subsidiyalar berish tartibi to‘g‘risidagi nizom» tasdiqlandi, deb xabar berdi UzNews.uz.
Nizomga ko‘ra, «2+6» dasturi joriy etiladi — unga ko‘ra, xorijiy til bo‘yicha kamida bazaviy sertifikatga ega bo‘lgan yoshlar dastlabki 2 oyni o‘z mablag‘i hisobidan to‘laydi.
Shundan so‘ng, agar o‘qish davom ettirilsa, keyingi 6 oy uchun davlat subsidiyasi ajratiladi. Bu mablag‘lar Yoshlar ishlari agentligi huzuridagi Davlat yoshlar siyosati qo‘llab-quvvatlash jamg‘armasi hisobidan beriladi.
Har oyda subsidiya miqdori quyidagicha belgilangan:
• Toshkent shahrida — 2 BHMgacha;
• viloyat markazlari va Qoraqalpog‘iston Respublikasida — 1,5 BHMgacha;
• tumanlarda — 1 BHMgacha.
Yoshlar ishlari agentligi ma’lum qilishicha, 2025–2026-yillarda 20 ming nafar yoshga subsidiya ajratiladi. Shuningdek, 2031-yilgacha har yili yana 20 ming nafar ishtirokchiga davlat yordami taqdim etiladi. Agar yil davomida limitdan oshib ketilsa, subsidiya to‘lovlari keyingi yilgacha to‘xtatiladi.
Subsidiyalar faoliyat yuritayotgan va reyting platformasiga ro‘yxatdan o‘tgan, shuningdek, elektron darsga qatnashuvni kuzatish tizimiga ulangan o‘quv markazlariga beriladi.
“Zamin”ni Telegramʻda oʻqing!
