Dubay hukumati axborot xizmatining ma’lumotiga ko‘ra, BAAning DP World kompaniyasi va o‘zbekistonlik Tashkent Invest kompaniyasi Toshkentda logistika terminali qurish bo‘yicha kelishuv imzoladi, deb Kursiv.media xabar berdi.
Loyiha uchun jalb qilingan investitsiyalar miqdori 288 million dollar (taxminan 3,57 trillion so‘m) deb baholanmoqda. Terminal Yangihayot tumanidagi "Yangi Avlod" sanoat zonasida joylashtiriladi.
Bu maqsadda qo‘shma korxona tashkil etiladi. Unda Tashkent Invest — shahar hokimligiga qarashli kompaniya — 15% ulushga ega bo‘ladi, qolgan qismi esa BAA kompaniyasiga tegishli bo‘ladi.
DP World rahbari Sultan Ahmad bin Sulayemning ta’kidlashicha, ushbu hamkorlik O‘zbekistonni Markaziy Osiyoda logistika va savdo markazi sifatida rivojlantirishga sodiqlikni ifodalaydi.
Toshkentdagi multimodal logistika terminali mintaqani jahon darajasidagi infratuzilma va intellektual logistika imkoniyatlari bilan ta’minlaydi.
Terminal tarkibiga quruq port, bojxona nazorati hududlari va omborxonalar kiradi. Loyihaning birinchi bosqichida 2026–2027 yillar oxiriga qadar 63 ming kv.m temir yo‘l terminali va omborlar qurilishi rejalashtirilgan.
“Zamin”ni Telegramʻda oʻqing!
