Kept konsalting kompaniyasining 2025-yil oktyabrda e’lon qilingan “aqlli shaharlar” reyting natijalariga ko‘ra, Toshkent “rivojlanish salohiyatiga ega” shaharlar guruhiga kiritildi, deb UPL.uz xabar berdi. Reytingda MDH va BRIKS+ davlatlarining 15 shahri qamrab olingan.
Toshkent 50 balldan kam natija qayd etib, reytingning o‘rta toifasiga kira olmadi. Eng zaif natija “aqlli biznes va bandlik” yo‘nalishida kuzatildi — 40,4 ball bilan 14-o‘rin. Sabab sifatida raqamli xizmatlarning yetarli emasligi ko‘rsatilgan.
Ekologik barqarorlik sohasida ham muammolar bor — har bir aholiga 3 kv.m yashil maydon to‘g‘ri keladi va shahar maydonining faqat 2% qismi ko‘kalamzorlashtirilgan. Shuningdek, havo ifloslanishi indeksi 101−150 oralig‘ida turishi qayd etilgan.
Shahar transportidagi tiqinlar ko‘p vaqt talab qilmoqda — ko‘rsatkich 10,7 deb baholangan. Shuningdek, ochiq ma’lumotlar portali yo‘q va shahar boshqaruvi bo‘yicha ma’lumotlar kam yangilanadi.
Shu bilan birga, Toshkent elektromobillar tarqalishi bo‘yicha MDHda yetakchi, “aqlli yoritish” va “aqlli schyotchiklar” tizimlari joriy etilgan. Turizm va mehmonxona infratuzilmasi yo‘nalishida ham ijobiy o‘zgarishlar qayd etilgan.
“Zamin”ni Telegramʻda oʻqing!
