O‘zbek qizining “Osiyoning Garvardi”dagi g‘alabasi — milliy iftixor ramzi
Koreya Respublikasining eng nufuzli universitetlaridan biri sanalgan Yonse universitetida (Yonsei University) bo‘lib o‘tgan 31-xalqaro koreys tili va adabiyoti ijodiy tanlovida o‘zbekistonlik talaba, Toshkent davlat sharqshunoslik universitetining 4-bosqich talabasi Sabohat G‘ofurova xorijlik ishtirokchilar orasida birinchi o‘rinni qo‘lga kiritdi. Bu nafaqat bir yosh iqtidor sohibasining, balki butun O‘zbekiston ta’lim tizimi va yosh avlodining katta yutug‘idir.
76 davlat va 1400 ishtirokchi orasida o‘zbek qizining zafarli chiqishi
Koreyada 2025-yil 1-oktyabr kuni o‘tkazilgan mazkur tanlov Xangul — koreys yozuvining yaratilishiga 579-yil to‘lgan sana munosabati bilan tashkil etildi. “Oyna” mavzusidagi she’r va “Xotiralar” mavzusidagi esse yo‘nalishlarida jahonning 76 mamlakatidagi 1400 dan ziyod ishtirokchi o‘z ijodini taqdim etdi.
Tanlov jarayonida ishtirokchilar nafaqat tilni mukammal bilishini, balki koreys madaniyatiga bo‘lgan hurmati va estetik his-tuyg‘ulari orqali ham baholandi.
Sabohatning asari hakamlar hay’atida katta taassurot qoldirdi. Uning ijodiy ishida tilga muhabbat, xotira, inson qalbi va madaniyat uyg‘unligi chuqur his qilingan. Shuning uchun ham o‘zbek talabasi nafaqat xorijliklar orasida birinchi, balki umumiy reytingda koreys ishtirokchilar bilan bir qatorda uchinchi o‘rinni egalladi.
Yonse universiteti — ilm va madaniyatning Osiyodagi timsoli
1885-yilda tashkil etilgan Yonse universiteti Koreya ta’lim tizimining iftixori hisoblanadi. Uning nufuzi shunchalik yuqoriki, dunyoda “Osiyoning Garvardi” deb tan olinadi. Universitet QS va Times xalqaro reytinglarida yillar davomida 100 talik orasida o‘rin olib keladi.
Samsung, LG, Hyundai kabi yirik kompaniyalar asoschilari aynan shu dargohda bilim olgan. Universitet faqat ilmiy jihatdan emas, balki madaniy va ijodiy muhitda ham yuqori nufuzga ega.
2024-yilda uning bitiruvchisi, yozuvchi Xan Gan adabiyot bo‘yicha Nobel mukofotiga sazovor bo‘lgani bu ta’lim muassasasining xalqaro miqyosdagi obro‘sini yanada mustahkamladi.
O‘zbek yoshlari – yangi avlodning xalqaro yutuqlari
Sabohat G‘ofurovaning bu yutug‘i ortida yillar davomida qilingan mehnat, intizom va ilmiy fidoyilik yotadi. Uning g‘alabasi so‘nggi yillarda O‘zbekiston ta’lim tizimida amalga oshirilayotgan tub islohotlar, xorijiy tillarni o‘rganishga yaratilayotgan imkoniyatlar va yoshlar uchun ochilayotgan yangi yo‘llarning natijasi sifatida baholanadi.
Prezident Shavkat Mirziyoyev tashabbuslari bilan so‘nggi yillarda yoshlar uchun xalqaro stipendiyalar, akademik almashinuvlar va zamonaviy ta’lim muhiti yaratilmoqda. Sabohatning g‘alabasi ana shu siyosatning samarasi ekanini hayotning o‘zi isbotlab turibdi.
Milliy iftixor va ilhom manbai
Sabohatning bu muvaffaqiyati nafaqat shaxsiy yutuq, balki o‘zbek yoshlarining xalqaro maydondagi nufuzini ko‘rsatuvchi yorqin namunadir. Uning nomi orqali O‘zbekiston ilmiy va madaniy salohiyati yana bir bor jahon sahnasida yangradi.
Bu g‘alaba har bir yoshga ilhom bag‘ishlaydi: mehnat, bilim va sabot bilan dunyoda har qanday cho‘qqini zabt etish mumkinligini isbotlaydi.
O‘zbek qizining “Osiyoning Garvardi”dagi birinchiligi — yurtimiz yoshlari uchun yangi ilhom, xalqimiz uchun esa faxr va iftixor manbai bo‘ldi.
“Zamin”ni Telegramʻda oʻqing!
