O‘zbekistonga Yaqin Sharq davlatlaridan qaytarilgan fuqarolar soni 8 mart soat 07:00 holatiga ko‘ra 19 347 nafarga yetdi. Bu haqda Tashqi ishlar vazirligi ma’lumotiga tayanib mahalliy OAV xabar qildi.
Ma’lum qilinishicha, 7 mart kuni Saudiya Arabistonidan 9 ta reys orqali 1 680 nafar, Birlashgan Arab Amirliklaridan esa 2 ta reys bilan 394 nafar fuqaro vatanga olib kelingan. Shu kuni Erondan ham 5 nafar O‘zbekiston fuqarosi qaytarilgan.
Shuningdek, Qatar va Saudiya Arabistonidagi O‘zbekiston elchixonalari Transport vazirligi bilan hamkorlikda Dohada bo‘lib turgan fuqarolarning birinchi guruhini — 208 nafar vatandoshni evakuatsiya qilgan. Ular Centrum Air reysi bilan Ar-Riyoddan uchib, 8 mart kuni soat 05:40 da Toshkentga sog‘-salomat yetib kelgan.
Ayni paytda keyingi evakuatsiya bosqichi uchun fuqarolarning ikkinchi guruhi — 126 nafar vatandosh ham shakllantirilgan. Ularni Doha shahridan Riyod orqali Toshkentga charter reys bilan olib kelish rejalashtirilgan. Qayd etilishicha, vatandoshlarni qaytarish ishlari tizimli va bosqichma-bosqich davom ettirilmoqda.
“Zamin”ni Telegramʻda oʻqing!
