O'zbekiston bo'ylab 13 va 14 mart kunlari umumxalq xayriya hashari o'tkazilishi belgilandi. "Obod yurt mahalladan boshlanadi" shiori ostida tashkil etilayotgan mazkur tadbirda barcha hududlar qamrab olinadi. O'zbekiston mahalla uyushmasi ma'lumotiga ko'ra, ushbu kunlarda ko'chalar, xonadonlar, qabristonlar hamda muqaddas qadamjolarni tartibga keltirish ishlari amalga oshiriladi.
Hashar doirasida bolalar maydonchalarini ta'mirlash, daraxtlarga shakl berish va "Yashil makon" umummilliy loyihasi doirasida ko'chatlar ekish rejalashtirilgan. Shuningdek, ijtimoiy himoyaga muhtoj oilalar holidan xabar olish, ularning uy-joy sharoitlarini yaxshilashga ko'maklashish ham tadbirning asosiy yo'nalishlaridan biri hisoblanadi. Ko'ngillilar va obodonlashtirish xizmatlari hamkorligida amalga oshiriladigan bu xayrli ishlar yurtimizda o'zaro yordam an'analarini yanada mustahkamlashga xizmat qiladi.
Bahor fasliga tayyorgarlik ko'rish, hududlarni toza va ozoda saqlash maqsadida o'tkazilayotgan ushbu tadbirda barcha yurtdoshlarimiz faol ishtirok etishi kutilmoqda. Hashar nafaqat atrof-muhitni obod qilish, balki mahallalarda ahillik va hamjihatlik muhitini yanada kuchaytirishga qaratilgan.
“Zamin”ni Telegramʻda oʻqing!
