O'zbekistonda uy-joy sotib olishni rejalashtirayotgan fuqarolar uchun yangi imkoniyat yaratilmoqda. Prezident farmoniga muvofiq, 2024 yil 1 iyuldan boshlab maqsadli ipoteka depozitlari tizimi sinov tariqasida ishga tushiriladi. Bu tizim ayniqsa davlat subsidiyasini qo'lga kiritgan fuqarolar uchun katta yengillik bo'lib, boshlang'ich badalni to'plash jarayonini osonlashtiradi.
Yangi tartibga ko'ra, subsidiya ajratilishi tasdiqlangan fuqarolar banklarda maxsus hisob raqam ochishlari mumkin. Davlat tomonidan ajratilgan subsidiya mablag'lari ushbu hisob raqamga boshlang'ich kapital sifatida o'tkazib beriladi. Banklar esa hisobdagi qoldiq mablag'larga bozor foiz stavkalari bo'yicha daromad hisoblab boradi. Bu fuqarolarga o'z mablag'larini ko'paytirish va uy-joy uchun kerakli badalni tezroq yig'ish imkonini beradi.
Mazkur jamg'arma muddati 12 oygacha etib belgilangan. Agar bir yil davomida uy-joy xarid qilish bo'yicha bitim amalga oshmasa, mablag'lar qaytariladi. Bunda fuqaroning shaxsiy jamg'armalari uning o'ziga qaytarilsa, davlat subsidiyasi va unga hisoblangan foizlar qaytadan davlat byudjetiga o'tkaziladi. Eksperimentning batafsil reglamenti 2024 yil 1 iyunga qadar tasdiqlanishi ko'zda tutilgan. Shuni alohida ta'kidlash kerakki, foiz stavkalarini subsidiyalash bo'yicha to'lovlar faqat ipoteka krediti amalda berilgandan so'nggina boshlanadi.
“Zamin”ni Telegramʻda oʻqing!
