Toshkent shahrining Sergeli tumanida aholi va ayniqsa bolalar uchun xavf tug'dirayotgan kanal ustidan o'tish joyi bo'yicha rasmiylar munosabat bildirdi. Avvalroq mahalliy aholi kanalni kesib o'tish uchun kommunikatsiya quvurlaridan foydalanishga majbur bo'layotgani haqida xabarlar tarqalgan edi. Ushbu holat jamoatchilikda haqli e'tirozlarni keltirib chiqargach, tuman hokimligi mas'ullari voqea joyiga chiqib, vaziyatni o'rgandi.
O'rganish natijalariga ko'ra, hududda xavfsizlikni ta'minlash maqsadida tezkor choralar ko'rishga qaror qilindi. Hozircha o'tish joyini butunlay yopib qo'yish o'rniga, uni vaqtincha tartibga keltirish va obodonlashtirish ishlari olib boriladi. Xususan, keng ko'lamli qurilish ishlari boshlangunga qadar quvurlar ustidan o'tish joyi maxsus himoya to'siqlari bilan jihozlanadi. Bu esa piyodalarning, ayniqsa maktab o'quvchilarining kanalni xavfsiz kesib o'tishiga imkon beradi.
Kelgusida ushbu hududda piyodalar va transport vositalari uchun zamonaviy hamda to'liq talablarga javob beradigan yangi ko'prik qurilishi rejalashtirilgan. Mutasaddilar mazkur loyiha bosqichma-bosqich amalga oshirilishini va aholi uchun qulay sharoitlar yaratilishini ma'lum qildi. Ayni paytda hududdagi ishlar nazoratga olingan bo'lib, xavfsizlik choralari kuchaytirilmoqda.
“Zamin”ni Telegramʻda oʻqing!
