Statistika agentligi ma'lumotlariga ko'ra, 2025 yilda Toshkent shahrida ta'lim xizmatlarining umumiy hajmi 18,8 trillion so'mni tashkil etdi. Ushbu ko'rsatkich bo'yicha poytaxt tumanlari orasida Chilonzor tumani mutlaq yetakchiga aylandi. Tumanda ko'rsatilgan ta'lim xizmatlari hajmi 2,99 trillion so'mga yetgan.
Reytingning yuqori pog'onalaridan Yunusobod va Olmazor tumanlari ham joy oldi. Ularning ko'rsatkichlari mos ravishda 2,19 trillion hamda 2,15 trillion so'mni tashkil qiladi. Mutaxassislarning ta'kidlashicha, ushbu hududlarda ta'lim bozorining bunday yuqori bo'lishi oliy o'quv yurtlari, xususiy maktablar va turli o'quv markazlarining ko'pligi bilan bevosita bog'liq.
Boshqa tumanlar kesimida Mirzo Ulug'bek tumani 1,77 trillion so'm, Mirobod tumani 1,48 trillion so'm, Shayxontohur tumani 1,41 trillion so'm va Yakkasaroy tumani 1,08 trillion so'm natija qayd etgan. Bu hududlarda ham ta'lim sohasi barqaror rivojlanib bormoqda.
Ta'lim xizmatlari eng kam ko'rsatilgan hududlar qatoriga esa Sergeli, Yangihayot va Bektemir tumanlari kiritildi. Xususan, Sergeli tumanida bu ko'rsatkich 291,9 milliard so'mni, Yangihayot tumanida 213,1 milliard so'mni tashkil etgan bo'lsa, eng past natija Bektemir tumanida kuzatildi. Bu tumanda ta'lim xizmatlari hajmi bor-yo'g'i 43,8 milliard so'mga teng bo'lgan.
“Zamin”ni Telegramʻda oʻqing!
