O‘zbekistonlik bokschilar Rossiyadagi musobaqada yorqin g‘alabalar qozondi

Rossiya Federatsiyasining Chelyabinsk shahrida bo‘lib o‘tgan "IBA.Pro 2" professional boks turniri hamyurtlarimiz uchun muvaffaqiyatli yakunlandi. Bu haqda O‘zbekiston professional boks federatsiyasi matbuot xizmati xabar tarqatdi.

Musobaqaning asosiy janglaridan birida "Premier Boxing Academy" jamoasi a’zosi Saidjamshid Jafarov rossiyalik tajribali bokschi Sergey Lubkovichga qarshi ringga ko‘tarildi. Super yarim o‘rta vazn toifasida o‘tkazilgan olti raundlik to‘liq jangda Saidjamshid raqibini ochkolar bo‘yicha mag‘lubiyatga uchratdi. Bu g‘alaba Saidjamshidning prof karyerasida muhim ahamiyatga ega bo‘lsa, Lubkovich uchun esa professional faoliyatidagi ikkinchi mag‘lubiyat bo‘ldi. U bugungacha 18 jangda g‘alaba qozonib kelayotgan edi.

Ushbu kechaning yana bir yorqin voqeasi sifatida Madiyar Saidrahimovning ajoyib g‘alabasi qayd etildi. Olti raundlik bahsda u mezbonlar vakili Andrey Stotskiyni muddatidan avval taslim etishga majbur qildi. Bu Madiyarning professional ringdagi ikkinchi g‘alabasi hisoblanadi.

Mazkur g‘alabalar haqida rasmiy ma’lumotni O‘zbekiston professional boks federatsiyasi tarqatdi. Mutaxassislar ikki bokschining ham texnik va psixologik jihatdan yaxshi tayyorgarlikda ekanini ta’kidlashmoqda.

Siz nima deb o‘ylaysiz: Saidjamshid va Madiyar — kelajakda jahon chempionlari bo‘lishi mumkinmi? “Zamin”ni Telegramʻda oʻqing!