“Inter”ning 93-daqiqadagi goli toza — sobiq hakam shubhalarga nuqta qo‘ydi

Yevropa Chempionlar Ligasi yarim finalida “Inter” va “Barselona” o‘rtasida kechgan dramatik javob bahsida yuz bergan bir vaziyat atrofida jonli muhokamalar hali ham to‘xtagani yo‘q. Milanliklar uchrashuvning 93-daqiqasida hisobni 3:3 ko‘rinishiga keltirgan bo‘lsa-da, bu golning qonuniyligi atrofida bahslar kelib chiqqandi. Bugun esa ushbu bahsga yuqori malakali sobiq hakam Pavel Fernandes aniq baho berdi.

Fernandes o‘z bayonotida Franchesko Acherbining tenglashtiruvchi goli oldidan Denzel Dumfrisning harakatida hech qanday qoida buzilishi bo‘lmaganini ta’kidladi.

"Golda hech qanday shubhali harakat bo‘lmagan. Dumfris to‘pni Jerar Martindan aniq va doiradagi qoidalarga muvofiq olib qo‘ydi. Kataloniyalik futbolchi goldan so‘ng hakamga e’tiroz bildirdi, ammo bu holatda unda xatolik bor edi. Hakam Shimon Marchinyak to‘g‘ri qaror qabul qildi", — deb yozdi Fernandes.

Mazkur vaziyat shundoq ham shiddatli kechayotgan o‘yinga yanada qizg‘inlik bag‘ishlagandi. “Inter” tomonidan kiritilgan bu to‘p uchrashuvning burilish nuqtasiga aylandi va italiyaliklarni finalga olib chiqdi.

Fernandesning izohi so‘nggi kunlarda media va muxlislar orasida keng muhokama qilingan vaziyatga nuqta qo‘ydi, desa bo‘ladi. Ba’zi mutaxassislar Dumfris harakatini fol deb baholagan bo‘lsa, FIFA litsenziyasiga ega bo‘lgan hakamning fikrida bunday talqinga o‘rin qoldirilmagan.

Endilikda “Barselona” bu vaziyatni bahona qilmasdan, o‘z xatolarini tan olishi va kelgusi mavsum uchun jiddiy xulosa chiqarishiga to‘g‘ri keladi. “Inter” esa hal qiluvchi golning shaffofligi fonida so‘zsiz finalga loyiq ekanini yana bir bor isbotladi.

Bu bahs yanada shuni ko‘rsatdiki, har bir vaziyatda hakamning malakali va neytral qaror chiqarishi o‘yin taqdirini hal qiluvchi omil bo‘lib qolmoqda. “Zamin”ni Telegramʻda oʻqing!