«Chelsi» katta o‘zgarishlar ostonasida: 7 futbolchi jamoani tark etadi!

Joriy mavsumda Yevropa Chempionlar ligasida ishtirok etishga yaqinlashgan «Chelsi» klubi yozgi transfer oynasida tarkibda jiddiy o‘zgarishlar qilishni rejalashtirmoqda. Londonliklar tarkibdagi bir qator asosiy tarkibga kira olmagan futbolchilar bilan xayrlashishga qaror qildi.

Taniqli jurnalist va futbol ekspertlaridan biri bo‘lgan Nizaar Kinsellaning ma’lum qilishicha, «aristokratlar»ning murabbiylar shtabi jamoaning yangi mavsum rejalariga mos kelmagan 7 nafar futbolchi bilan xayrlashishni maqsad qilgan.

Transferga qo‘yiladigan o‘yinchilar orasida Ben Chiluell, Karni Chukvuemeka, Armando Broya, Aksel Disasi, Kepa Arrisabalaga, Joau Feliks va Renatu Veyga bor. Ularning aksariyati bu mavsum boshqa klublarda ijara asosida to‘p surmoqda va «Chelsi» bosh murabbiyi Enso Mareska ularni kelgusi rejalarida ko‘rmayapti.

Aytish joizki, bu futbolchilardan ayrimlariga bir qator klublar jiddiy qiziqish bildirmoqda. Masalan, «Aston Villa» klubi Aksel Disasini doimiy shartnoma asosida o‘z safiga qo‘shib olishni rejalashtirmoqda. «Milan»da ijara asosida o‘ynayotgan Joau Feliksni uning sobiq klubi «Benfika» qaytarish istagida.

Ispaniyalik darvozabon Kepa Arrisabalagaga esa Angliyaning «Bornmut» klubi doimiy transfer bilan ega chiqmoqchi bo‘lsa, «Real Madrid» uni yana bir mavsumga ijaraga olish masalasini o‘rganyapti. O‘z navbatida, Renatu Veygani esa Italiyaning «Yuventus» klubi o‘z tarkibida saqlab qolish niyatida ekanini bildirgan.

«Chelsi» rahbariyati ushbu futbolchilar transferidan tushgan mablag‘ni yangi xaridlar uchun sarflashga mo‘ljallagan. Enso Mareskaning jamoani yangi mavsumda yanada kuchaytirish va kuchli tarkib shakllantirish istagi bunga asosiy sabab bo‘lmoqda.

Zamin.uz tahririyati London klubining transfer bozoridagi harakatlarini diqqat bilan kuzatib boradi. Siz bu o‘zgarishlar haqida qanday fikrdasiz? «Chelsi» ushbu qaror bilan kelasi mavsumda muvaffaqiyat qozona oladimi? “Zamin”ni Telegramʻda oʻqing!