Sa Pintu “Istiqlol”ga qaytadi — Masharipovga tanish murabbiy

Eronning eng nufuzli klublaridan biri – Tehrondagi “Istiqlol” bosh murabbiy lavozimiga yangi mutaxassis tayinladi. Bu galgi tanlov portugaliyalik tajribali murabbiy Rikardu Sa Pintuga to‘xtadi. U klub bilan bir yillik shartnomaga imzo chekdi va rasman o‘z ishiga kirishdi.

Futbol ishqibozlari uchun qiziq tomoni shundaki, Sa Pintu “Istiqlol”ga begona emas. U 2022/23 yilgi mavsumda ham ushbu jamoani boshqargan va Eron Superkubogida zafar quchgan. Uning raqobatbardosh va intizomli o‘yin uslubi, jamoani jismoniy va psixologik jihatdan ruhlantirishi mahalliy mutaxassislar va futbol muxlislari tomonidan yuqori baholangan edi.

Sa Pintuning qayta tayinlanishi “Istiqlol”ning yangi mavsumdagi katta maqsadlaridan darak beradi. Klub rahbariyati undan nafaqat ichki chempionatda, balki Osiyo miqyosida ham yuqori natijalar kutmoqda.

Eslatib o‘tamiz, o‘zbekistonlik yulduz futbolchi Jaloliddin Masharipov aynan shu klub safida to‘p surmoqda. Masharipov Sa Pintu bilan avval ham ishlash tajribasiga ega bo‘lgan va murabbiyning ish uslubini yaxshi biladi. Mutasaddilarning fikricha, ular o‘rtasidagi yaxshi o‘zaro tushunish “Istiqlol”ning hujumkor o‘yinida muhim rol o‘ynaydi.

Sa Pintuning kelishi nafaqat Tehron klubi, balki o‘zbekistonlik muxlislar uchun ham qiziq voqelik hisoblanadi. Masharipovning yangi mavsumda qanday o‘sish va muvaffaqiyatlarga erishishi aynan mana shu hamkorlik natijasiga bog‘liq bo‘lishi mumkin. “Zamin”ni Telegramʻda oʻqing!