Klublar o‘rtasidagi mundial haqida Venger va Kloppning bahsli fikrlari...

Futbol dunyosida eng ko‘p muhokama qilinayotgan mavzulardan biri – Klublar o‘rtasidagi Jahon chempionati, deb xabar berdi BBC. Yaqinda "Arsenal"ning sobiq bosh murabbiyi Arsen Venger va "Liverpul"ning sobiq bosh murabbiyi Yurgen Klopp o‘rtasida turnirning o‘tkazilishiga oid fikrlari jiddiy bahslarga sabab bo‘ldi.

Yurgen Klopp klublar o‘rtasidagi mundialni qattiq tanqid qilgani ma’lum. U jamoalar va futbolchilarga ortiqcha yuk tushishi, mavsumlar oralig‘idagi dam olish imkoniyati cheklanayotganini qayd etgan. Venger esa Kloppning bu qarashini mutlaqo rad etdi: “Har kim o‘z fikrini aytadi, lekin men bu yerdagi klublarning aksariyati turnirda ishtirok etishni istashini aniq bilaman. Asosiy savol — bu musobaqa muxlislarga yoqadimi yoki yo‘qmi? Menimcha, tomoshabinlar soni kutilganidan ancha ko‘p bo‘ldi”, – deydi fransiyalik mutaxassis.

Klublar o‘rtasidagi Jahon chempionati 15 iyundan 13 iyulgacha AQSHda o‘tmoqda va bu yil ilk bor 32 ta jamoa ishtirok etdi. Yakuniy final 13 iyul, yakshanba kuni Toshkent vaqti bilan 23:59 da bo‘lib o‘tadi — PSJ va "Chelsi" chempionlik uchun to‘qnash keladi.

Vengerning so‘zlariga ko‘ra, ushbu turnir futbolni yangi bozorlar va yangi auditoriyalar uchun yanada ommalashtiradi. “Bu turnir jamoalar uchun ham, muxlislar uchun ham yangi imkoniyatlar eshigini ochadi. Agar bu musobaqa haqiqatan ham keraksiz bo‘lsa, klublar va futbolchilar unda ishtirok etishga urinishmasdi”, — deydi u.

Klopp va Venger o‘rtasidagi bahs futbol muhitida keng muhokamaga sabab bo‘ldi. Ayrimlar Kloppni qo‘llab-quvvatlab, futbolchilarning salomatligi va dam olishi muhimligini aytmoqda. Boshqalar esa Venger fikriga qo‘shilib, global futbol rivoji va muxlislar uchun yangi imkoniyatlarni alohida ta’kidlamoqda.

Vaqt ko‘rsatadi: Klublar o‘rtasidagi mundial haqiqatan ham katta shouga aylanadimi yoki tanqidchilarning xavotirlari o‘z isbotini topadimi? Ammo bir narsa aniq – futbol atrofidagi tortishuvlar va yangi tashabbuslar yanada qizg‘in bo‘lib borayotgani turnirning mavqeini faqat oshirmoqda. “Zamin”ni Telegramʻda oʻqing!