Superliganing 26-turidan o‘rin olgan «Buxoro» — «So‘g‘diyona» (2:0) uchrashuvidan so‘ng jamoa bosh murabbiyi Aleksandr Xomyakov matbuot anjumanida ishtirok etib, bellashuv haqidagi fikrlari, jamoa holati va Kubok finali oldidan tayyorgarlik haqida ochiq suhbat qildi, deb xabar berdi championat.asia.
«O‘yin oson kechmadi. Mavsum oxiriga kelib har bir bahs juda murakkab tus olmoqda, chunki barcha jamoalarga ochko zarur. Har bir klub o‘zi uchun muhim natija izlayapti, shu bois maydonda hech kimga yengil bo‘layotgani yo‘q. Bizda ham oson o‘yin yo‘q. Shogirdlarimga bor kuchini bergani uchun minnatdorman. Birinchi bo‘limda juda yaxshi harakat qildik, ikki gol urib oldik. Ikkinchi bo‘limda esa hisobni saqlab qolishga ko‘proq e’tibor berdik, bu esa tabiiy. Hatto ayrim daqiqalarda ustunlikni raqibga berib qo‘ydik, ammo intizom va xarakter hisobiga natijani saqlab qoldik», — dedi Xomyakov.
Murabbiy Izzatillo Po‘latovning ikkita goli haqida ham fikr bildirdi:
«Bu oldindan ishlangan maxsus taktika emas, lekin biz unga hujumlarga faol qo‘shilish imkoniyatini bergan edik. U bu imkoniyatdan a’lo darajada foydalandi. Izzatillo to‘g‘ri qarorlar qabul qildi va o‘ng qanotdan hujumlarga yaqinlashib, jamoaga g‘alaba keltirdi. Bu uning mehnatining natijasi», — dedi u.
Shu bilan birga, Xomyakov «Buxoro»ning faqat bir bo‘limda faol o‘ynayotgani haqidagi savolga ham javob berdi:
«Bu haqiqat. Bizning jamoa hozirgi sharoitda faqat bir taym davomida yuqori tempni ushlab tura olyapti. Intensivlikni oxirigacha saqlash juda qiyin. Sabablar bor — jismoniy charchoq, qisqa zaxira, turli jarohatlar. Grafik ham tig‘iz, bu ham ta’sir qilmoqda. Lekin biz har bir vaziyatdan chiqish yo‘lini izlayapmiz, vaziyatni yashirish niyatimiz yo‘q», — dedi murabbiy.
Kubok finalidagi raqib haqida so‘ralganda Xomyakov shunday javob berdi:
«Meni xabardor qilishicha, “Paxtakor” bugun Xorazmda ikkinchi tarkibi bilan o‘ynagan. Biz esa ularni kuzatish uchun hech kimni yubormadik. Nega desangiz, XXI asrda yashayapmiz — raqibni o‘rganish uchun maydonga borish shart emas. Video tahlillar, ma’lumotlar yetarli. Shuningdek, biz “superklub” emasmiz, birortani xizmat safariga yuborish uchun ham resursimiz cheklangan. Hozircha o‘z muammolarimizni hal qilishga diqqat qaratyapmiz».
Jamoa Kubok finaliga kuchni asrab qo‘ydimi, degan savolga u quyidagicha javob berdi:
«Biz o‘yin tanlamaymiz. Futbolchilarga “bugun sekin o‘ynanglar, ertaga muhim bahs” deb ayta olmayman. Har bir bahs — biz uchun final. Shuning uchun har safar bor kuch bilan harakat qilamiz. Men sehrgar emasman, finalda nima bo‘lishini oldindan ayta olmayman, ammo ishonch bilan aytamanki, jamoa maydonga g‘alaba uchun tushadi».
Anjuman yakunida murabbiy muxlislarga ham murojaat qildi:
«Biz uchun ishqibozlarning qo‘llab-quvvatlashi juda muhim. Ularning energiyasi futbolchilarga kuch beradi. Kubok finalida Buxoro namoyoni bo‘lishimiz uchun bor imkoniyatni ishga solamiz. Biz jamoa sifatida kurashamiz, muxlislar esa ruhiy jihatdan biz bilan bo‘lishsin», — dedi Aleksandr Xomyakov.
Bu so‘zlardan keyin jamoa atrofida yanada ijobiy muhit yaratildi. Muxlislar jamoani qo‘llab-quvvatlashga tayyor, chunki bu “Buxoro” uchun nafaqat Kubok yo‘li, balki klub tarixida yangi sahifa ochish imkoniyati hamdir.
“Zamin”ni Telegramʻda oʻqing!
