«Manchester Siti» bosh murabbiyi Xosep Gvardiola o‘z murabbiylik faoliyatidagi katta tarixiy belgi — 1000-o‘yin oldidan fikr bildirdi. Ispaniyalik mutaxassis joriy hafta yakunida APL doirasida «Liverpul»ga qarshi muhim bellashuvda jamoasi boshida bo‘ladi. Bu o‘yin Gvardiolaning faoliyatidagi minginchi rasmiy uchrashuv sifatida tarixga kiradi.
«Murabbiy sifatida 1000 ta o‘yin o‘tkazish — bu juda katta his va ayni paytda ulkan mas’uliyat. Qachonki “Barselona B”da faoliyatimni boshlaganman, bu kabi raqamga yetishimni hatto tasavvur ham qilmaganman. Shunda faqat bitta maqsad bor edi — ishingni sidqidildan bajarish, futbolda to‘g‘ri yo‘lni tanlash va jamoangning yuzini yoritish», — dedi Gvardiola jurnalistlar bilan suhbatda.
Uning so‘zlariga ko‘ra, faoliyati davomida omad va mehnat unga hamroh bo‘lgan.
«Menga omad kulib boqdi — men uchta buyuk klubning boshida turish sharafiga ega bo‘ldim. “Barselona”, “Bavariya” va “Manchester Siti”da men doimo ishonch va qo‘llab-quvvatlashni his qildim. Hech qanday tashqi bosimsiz, faqat futbol va jamoa uchun yashadim. Bu yillar men uchun hayotning eng yorqin sahifalari bo‘ldi», — dedi u.
Gvardiola shuningdek, erishgan sovrinlar soni haqida ham fikr bildirdi:
«Rostini aytsam, bunday ko‘p g‘alabalarga erishishimni tasavvur ham qilmaganman. Lekin bu yo‘l men uchun ajoyib tajriba bo‘ldi. Har bir o‘yin, har bir musobaqa men uchun yangi dars, yangi his bo‘ldi. Agar imkonim bo‘lsa, men bu safarning bir lahzasini ham almashtirmasdim», — dedi murabbiy.
Ispaniyalik mutaxassis so‘nggi 18-yil davomida uning yonida bo‘lgan barchaga minnatdorlik izhor etdi:
«Birma-bir ism sanab chiqish qiyin, lekin men bilan birga mehnat qilgan har bir inson — futbolchi, murabbiylar shtabi va klub xodimlariga chin dildan rahmat aytaman. Shuningdek, faoliyatim davomida meni qo‘llab-quvvatlab turgan oilam — mening asosiy kuchim va suyanchim bo‘ldi».
Shunday qilib, Gvardiolaning minginchi o‘yini nafaqat raqam, balki uning butun faoliyatidagi tajriba, mehnat va sadoqatning ramzi sifatida futbol tarixi sahifalarida qoladi.
“Zamin”ni Telegramʻda oʻqing!
