WBC yo‘nalishi bo‘yicha sobiq jahon chempioni Deontey Uaylder o‘z kelajagi, muxlislar munosabati va navbatdagi rejalari haqida ochiq fikr bildirdi. Tajribali bokschi jamoatchilik qarashlari tez o‘zgarib ketishini tan olib, bunga nisbatan o‘z pozitsiyasini bildirdi.
Uaylderning so‘zlariga ko‘ra, inson cho‘qqida turgan paytda ham tanqidlardan qutula olmaydi. Uning ta’kidlashicha, faoliyati avjida bo‘lganida ham ayrimlar uni kamsitgan, ringni tark etgach esa, yana uni sog‘inganini ayta boshlashgan.
“Odamlar sendan nima xohlashini o‘zi ham bilmaydi. Bir kuni senga ishonmaydi, boshqa kuni esa aynan seni qayta ko‘rishni istaydi. Men ulardan so‘rayman: rostdan ham eski Uaylder kerakmi yoki yangisini ko‘rishni istaysizlarmi?” — dedi bokschi.
Shu bilan birga, u barchani rozi qilish mumkin emasligini yaxshi anglashini ta’kidladi. Ayniqsa, professional boksda tanqidga chidamli bo‘lish, qalin teri va hazil hissiga ega bo‘lish juda muhim ekanini qayd etdi. Uaylder o‘zini aynan shunday fazilatlarga ega deb hisoblaydi.
So‘zining yakunida amerikalik bokschi katta maqsadlarini yashirmadi. U o‘zining yana bir bor ringda porlab, butun dunyoni hayratga solishini, hatto Muhammad Ali kabi boks olamini larzaga keltirishni niyat qilganini bildirdi. Uaylderning bu bayonotlari uning hali so‘nggi so‘zini aytmaganini yaqqol ko‘rsatmoqda.
“Zamin”ni Telegramʻda oʻqing!
