«Bayer» va «Manchester Yunayted» klublarining sobiq bosh murabbiyi Erik ten Xag zamonaviy futbolda klub xo‘jayinlari (egalari) ta’siri tobora ortib borayotganini tanqidiy ruhda baholadi. Niderlandiyalik mutaxassisning fikricha, bu jarayon ko‘p hollarda futbol manfaatiga xizmat qilmayapti — aksincha, qarorlar qimmatga tushyapti.
Ma’lumot uchun, ten Xag 2025 yil 1 sentyabr kuni «Bayer»dagi lavozimidan bo‘shatilgan edi. Hozirda esa u Niderlandiyaning «Tvente» klubida texnik direktor sifatida faoliyat yuritmoqda. Ya’ni u jarayonlarni faqat murabbiy sifatida emas, klub boshqaruvi nuqtayi nazaridan ham ichidan ko‘rib turibdi.
Ten Xagning ta’kidlashicha, vaziyat yildan yilga og‘irlashyapti: «Vaziyat tobora keskinlashib bormoqda. Tobora ko‘proq klub egalari o‘zlarini ko‘rsatishni istaydi. Odatda, ular futbolni yaxshi tushunishmaydi».
Uning fikriga ko‘ra, ayrim egalar sahnada ko‘proq ko‘rinish, ta’sirini namoyish qilish va “men ham qaror qilaman” degan kayfiyat bilan harakat qiladi. Lekin futbol — bu PR emas, u yerda xato qarorning narxi juda baland: natija ketadi, jamoa ruhi sinadi, muxlis asabiylashadi.
Shuningdek, ten Xag texnik direktorlar haqida ham keskin fikr bildirdi. Daily Mail onlayn-nashri keltirgan iqtibosga ko‘ra, u ba’zan qarorlar sport logikasiga emas, qulay sharoit va “o‘zini oqlash” mexanizmiga qurilishini aytgan:
«Texnik direktorlar, shuningdek, ko‘pincha natijalar qoniqarsiz bo‘lganda, qulay sharoitlar tufayli qaror qabul qilishadi».
Oddiy qilib aytganda, natija yomonlashsa, aybdor qidirish oson, ammo muammoning ildiziga kirish — qiyin. Ten Xag esa aynan shu nuqtada “futbolni boshqaruvchilar haqiqiy futbolni tushunsa” degan signalni beryapti.
Bu gaplar hozirgi futbol realiyatiga juda mos: pul ko‘paygan sari, ta’sir uchun kurash ham ortdi. Ammo muxlis uchun bir narsa muhim — maydonda natija va o‘yin sifati. Shuning uchun ten Xagning bu chiqishi ko‘pchilikka tanish fikrni yana bir bor ovoz chiqarib aytdi: futbolni futbolchilardek tushunadiganlar boshqarsa, klub ham nafas oladi.
“Zamin”ni Telegramʻda oʻqing!
