Afrika Millatlar kubogi finali haqiqiy trillerga aylandi. Mezbon Marokash o‘z maydonida Senegal bilan to‘qnash keldi, lekin hal qiluvchi lahzalar qo‘shimcha bo‘limlarda mehmonlar foydasiga ishladi: 0:1. Birgina gol — ammo butun qit’a taqdirini o‘zgartirgan gol.
Uchrashuvning ikkinchi bo‘limi esa tom ma’nodagi drama bo‘ldi. Hakam 90+9-daqiqada mezbonlar foydasiga penalti belgilaganidan so‘ng senegalliklar keskin norozilik bildirdi va hatto maydonni tark etib ketdi. Biroz vaqt — taxminan 10–15 daqiqadan keyin — jamoa sardori Sadio Mane sheriklarini orqaga qaytardi va o‘yin qayta davom etdi.
Penalti amalga oshirildi, ammo Marokash uchun bu ham qutqaruv bo‘lmadi: Diasning panenka uslubidagi zarbasini darvozabon Eduar Mendi o‘qib qo‘ydi va qaytardi. Shu epizoddan keyin o‘yin asosiy vaqtda hal bo‘lmadi va bahs qo‘shimcha bo‘limlarga ko‘chdi.
Qo‘shimcha bo‘limlar boshlanishi bilan Senegal “so‘nggi nuqta”ni qo‘ydi: 94-daqiqada Pape Guye g‘alaba to‘pini kiritdi. Ana shu gol Senegalga tarixiy natija olib keldi — jamoa o‘z tarixida ikkinchi bor qit’a chempionligini qo‘lga kiritdi.
Kecha Rabotdagi «Stade Prince Moulay Abdallah» arenasida o‘tgan finalda hayajon, tortishuv, bahsli qarorlar va qahramonliklar yetarli bo‘ldi. Bir tarafda — uyda chempion bo‘lish orzusi, ikkinchi tarafda — xarakter va iroda. Oxirida esa Senegalning sabri va sovuqqonligi ustun keldi.
Afrika Millatlar kubogi. Final
Marokash — Senegal 0:1
18 yanvar, Rabot, «Stade Prince Moulay Abdallah»
Gol: Pape Guye (94).
Foydalanilmagan penalti: Dias (90+24).
Marokash — Bunu, Hakimi, Aguyerd, Masina (Al Yamik, 89), Mazraui (Igamane, 98), Al Aynaui, Al Hannus, Saybari (Saloh-Eddin, 90+4), Ezzalzuli, Dias (Ahomash, 98), Al Kaabi.
Senegal — E.Mendi, M.Sarr, Niakate, Kamara (I.Sarr, 77), A.Mendi (Sek, 77), Diuf (Yakobs, 106), I.Guye, P.Guye, Mane, Ndiaye (Mbaye, 77), Jekson (Sh.Ndiaye, 90+3).
Ogohlantirishlar: Kamara (24), I.Sarr (90+9), Diuf (90+10), Saloh-Eddin (90+21), E.Mendi (90+21), An Nosiri (112), M.Sarr (113).
Xulosa oddiy, lekin qattiq: bu finalda Marokashga “bir penalti” yetmadi, Senegalga esa “bir gol” kifoya qildi. Va futbolning shunaqa qonuni bor — kim bosimda ham o‘zini yo‘qotmasa, oxirida bayram qilib ketadi. Senegal aynan shunday qildi.
“Zamin”ni Telegramʻda oʻqing!
