Afrika Millatlar kubogi rasman yakunlandi. Qit’a futboli bayrami dramatik tarzda kechgan final bilan yopildi: Senegal mezbon Marokashni yengib, o‘z tarixida ikkinchi bor Afrika chempioni unvonini qo‘lga kiritdi. Muxlislar uchun bu final — nafaqat natija, balki xarakter, bosim va taqdir sinovi bo‘lgan katta spektakl bo‘ldi.
Finaldan so‘ng esa turnirning individual mukofotlari o‘z egalarini topdi. Ya’ni, kubok kimga ketgan bo‘lsa, shaxsiy sovrinlar ham shu musobaqada eng katta iz qoldirgan futbolchilarga topshirildi.
Turnirning eng yaxshi futbolchisi sifatida Senegal sardori Sadio Manening nomi e’lon qilindi. U musobaqa davomida 6 ta bahsda maydonga tushib, 2 ta gol urdi va 3 ta golga uzatma berdi. Manening ustun jihati faqat raqamlarda emas: u jamoani ruhlantirgan yetakchi, eng og‘ir pallada ham jamoani “ushlab turgan” figura bo‘ldi.
Eng yaxshi to‘purar sovrini esa Marokash yarimhimoyachisi Brahim Diasga nasib etdi. U turnirda 5 ta gol urib, to‘purarlar poygasida hammadan oldinga chiqdi. Ha, finalda u penaltidan foydalana olmadi, ammo umumiy hisobda Diasning gollari Marokashni finalgacha olib kelgan asosiy omillardan biri bo‘lgani shubhasiz.
Marokashning finalgacha yetib borishida darvozabon Yosin Bununing hissasi ham katta bo‘ldi. Shuning uchun u turnirning eng yaxshi darvozaboni sifatida e’tirof etildi. Bunu ko‘p bor hal qiluvchi seyvlar bilan jamoasini saqlab qoldi, bosim ostida ham xotirjam o‘yin namoyish etdi va Marokashning finalga chiqqan yo‘lida “so‘nggi qal’a” vazifasini bajardi.
Qisqasi, Afrika Millatlar kubogi Senegalning chempionligi bilan yopildi, lekin Marokash ham bu musobaqada o‘zining kurashchanligi va darajasini ko‘rsatib berdi. Endi esa qit’a futboli yangi mavsumga yangi hikoyalar, yangi qahramonlar va yangi intriga bilan qaytadi.
“Zamin”ni Telegramʻda oʻqing!
