O‘zbekiston milliy jamoasi bosh murabbiyi Fabio Kannavaro yosh futbolchilar mavzusida o‘z pozitsiyasini ochiq aytdi. Mutaxassisga ko‘ra, futbolda hal qiluvchi omil pasportdagi raqam emas — maydondagi sifat, iqtidor va xarakter.
“Gap yoshda emas, sifatda”, — deya ta’kidladi Kannavaro. Uning fikricha, futbolchining necha yoshga kirgani emas, uning iste’dodi, o‘yinga tayyorligi va “jangchi” sifatidagi ruhiy quvvati muhim.
Italiyalik murabbiy bir narsani qat’iy aytadi: agar futbolchi 17 yoki 19 yoshda bo‘lsa-yu, kattalar o‘yiniga tayyor bo‘lsa, demak u milliy jamoaga munosib. “Nega uni faqat yoshi kichik deb U-20 yoki U-23da ushlab turishimiz kerak?” — degan savolni o‘rtaga tashladi Kannavaro. Ya’ni, tayyor kadrni “yosh” degan sabab bilan cheklab qo‘yish — to‘g‘ri yo‘l emas.
Kannavaro skauting va kuzatuv borasida ham qiziq fikr bildirdi. Uning aytishicha, u qaysidir bahsga borsa, bu oddiy “tashrif” yoki rasmiychilik emas. Asosiy maqsad — futbolchini real sharoitda, bosim ostida, haqiqiy tempda ko‘rish.
Mutaxassis stadion muhitini alohida qadrlaydi. “Safarda bo‘lsam ham stadionlarga borishni yaxshi ko‘raman. O‘yinni jonli ko‘rishga hech narsa yetmaydi”, — dedi u. Kannavaroga ko‘ra, uyda o‘tirib bir nechta videoni ketma-ket tomosha qilish — u qadar yoqimli emas, hatto zerikarli ham.
Eng muhim nuqta — “mayda detallar”. Kannavaro aynan shu jihatni urg‘ulab o‘tdi: ba’zi kichkina harakatlar, pozitsiya tanlash, to‘psiz yurish, duelga kirishishdagi qat’iyat yoki bir sekundlik qaror — videoda ko‘rinmay qolishi mumkin. Lekin o‘sha mayda nuqtalar keyinchalik katta farqni berishi, hal qiluvchi omilga aylanishi ehtimoldan xoli emas.
Xulosa shunday: Kannavaro milliy jamoaga tanlovda yoshga emas, tayyorlik va sifatga tayanish tarafdori. Demak, ertaga terma jamoada 18–19 yoshli futbolchini ko‘rib qolsak, ajablanmaymiz — chunki u “pasport” bilan emas, o‘yini bilan chaqiriladi.
“Zamin”ni Telegramʻda oʻqing!
