Fransiyaning "Marsel" klubi sharafini himoya qilayotgan 24 yoshli hujumkor futbolchi Meyson Grinvud joriy mavsum yakunlangach, faoliyatini Saudiya Arabistonida davom ettirishi mumkin. L'Equipe nashrining xabar berishicha, mahalliy klublar ingliz futbolchisini o'z safiga qo'shib olish uchun jiddiy tayyorgarlik ko'rmoqda. Saudiya Arabistoni Pro ligasi vakillari jahon futboli yulduzlarini jalb qilish siyosatini davom ettirib, Grinvud uchun katta mablag' ajratishga tayyor turibdi.
Hozircha futbolchiga qaysi klub aniq qiziqish bildirayotgani ma'lum emas. Biroq, Grinvudning "Marsel"dagi muvaffaqiyatli o'yinlari sababli uning atrofidagi vaziyatni Angliya va Ispaniyaning yetakchi jamoalari ham diqqat bilan kuzatib bormoqda. "Manchestr Yunayted" akademiyasi tarbiyalanuvchisi bo'lgan futbolchi 2024 yilda 26 million yevro evaziga fransuz klubiga o'tgan edi.
Joriy mavsumda Meyson Grinvud o'zini ko'rsatishga muvaffaq bo'ldi. U "Marsel" safida 37 ta uchrashuvda maydonga tushib, 25 ta gol urdi va 8 ta golli uzatmani amalga oshirdi. Futbolchining klub bilan amaldagi shartnomasi 2029 yilning yoziga qadar mo'ljallangan. Transfermarkt portali ma'lumotlariga ko'ra, uning hozirgi bozor qiymati 50 million yevroni tashkil etadi. Kelajakda futbolchi qaysi yo'nalishni tanlashi yaqin oylarda oydinlashadi.
“Zamin”ni Telegramʻda oʻqing!
