Superliganing 6-turida bo‘lib o‘tgan “Neftchi” – “Paxtakor” (0:1) uchrashuvidan so‘ng Toshkent klubi bosh murabbiyi Kamoliddin Tojiyev matbuot anjumanida ishtirok etib, bahs haqida o‘z fikrlarini bildirdi.
Murabbiyga ko‘ra, jamoa o‘yinga jiddiy tayyorgarlik ko‘rgan va uchrashuvni yaxshi ruhda boshlagan. Uning taʼkidlashicha, “Neftchi” kuchli raqib sifatida oxirigacha kurash olib borgan. Biroq bunday o‘yinlarda bitta gol hammasini hal qilishi mumkin va aynan shu holat uchrashuv taqdirini belgilagan.
Tojiyev birinchi bo‘limda kiritilgan goldan so‘ng, ikkinchi taymda hisobni saqlab qolish uchun jamoa ko‘proq himoyaviy o‘yin uslubiga o‘tganini aytdi. U barcha futbolchilarni maqtab, ularning o‘yin darajasidan mamnun ekanini bildirdi.
“Neftchi”ning hujumdagi samarasizligi haqida savolga esa murabbiy aniq javob berib, raqib tomonidan nima yetishmaganini ularning o‘zi tahlil qilishi kerakligini taʼkidladi. Shu bilan birga, “Paxtakor”ning himoyada jamoaviy va uyushqoq harakat qilgani g‘alabada muhim omil bo‘lganini qayd etdi.
O‘yin davomida futbolchilarning tez-tez yerda yotib qolishi haqidagi savolga javoban Tojiyev bu maxsus taktika emasligini aytdi. Uning so‘zlariga ko‘ra, baʼzi to‘qnashuvlar oqibatida shunday holatlar kuzatilgan, ammo bu ko‘p takrorlanmagan. Shuningdek, oldingi o‘yinlarda charchoq sezilgan bo‘lsa-da, bu bahsda u deyarli sezilmaganini bildirdi.
Uchrashuv rejasi haqidagi savolga javob berib, murabbiy oldindan aynan himoyaga asoslangan taktika tanlanmaganini aytdi. Uningcha, kim birinchi gol ursa, o‘sha jamoa ustunlikka ega bo‘ladigan o‘yin bo‘lgan va “Paxtakor” ushbu imkoniyatdan unumli foydalangan.
Tojiyevning fikricha, jamoa vaziyatdan kelib chiqib harakat qilgan va aqlli o‘yin tufayli muhim g‘alabaga erishgan.
“Zamin”ni Telegramʻda oʻqing!
