Polsha poytaxti Varshava shahrida faxriy sportchilar o‘rtasida nufuzli “Warsaw Veteran European Cup 2026” turniri bo‘lib o‘tdi. Ushbu musobaqada dunyoning 28 davlatidan qariyb 200 nafar tajribali dzyudochilar ishtirok etib, o‘zaro kuch sinashdi.
Quvonarlisi, O‘zbekiston terma jamoasi ushbu musobaqada yuqori natijalar qayd etdi. Terma jamoamizdan ishtirok etgan barcha to‘rt nafar vakil o‘z vazn va yosh toifalarida raqiblarini mag‘lub etib, chempionlik shohsupasiga ko‘tarildi.
Xususan, Timur Xudayqulov (-73 kg), Bahrom Inoyatov (-81 kg), Yerbol Rustamov (+100 kg) hamda Hamid Atajanov o‘z yo‘nalishlarida oltin medallarga sazovor bo‘lishdi. Ularning har biri musobaqa davomida ishonchli va ustun kurash namoyish etib, raqiblariga imkoniyat qoldirmadi.
Bu muvaffaqiyat natijasida O‘zbekiston terma jamoasi umumjamoa hisobida kuchli beshlikdan joy olishga erishdi. Bu esa milliy dzyudo maktabining faxriylar o‘rtasida ham yuqori darajada ekanini yana bir bor isbotladi.
Maʼlumot uchun, mazkur natijalar haqida O‘zbekiston dzyudo federatsiyasi matbuot xizmati rasman xabar bergan.
Qisqasi, o‘zbekistonlik faxriy dzyudochilar xalqaro maydonda yana bir bor o‘z mahorat va tajribasini namoyon etib, mamlakatimiz sport nufuzini yana-da oshirishga hissa qo‘shishdi.
“Zamin”ni Telegramʻda oʻqing!
