Bavariya bosh murabbiyi Vincent Kompany Chempionlar ligasi doirasidagi PSJga qarshi javob o‘yini oldidan tarkibda kutilmagan o‘zgarishga qo‘l urdi. Alphonso Davies zaxirada qoldirilib, uning o‘rniga Konrad Laimer chap qanot himoyasida maydonga tushadigan bo‘ldi. Bu qaror ko‘pchilik uchun kutilmagan holat bo‘ldi, chunki Davies jamoaning asosiy tarkib futbolchisi hisoblanadi. Bu haqda Goal.com xabar beradi.
Kompanyning ta’kidlashicha, bu qaror Konrad Laimer va Josip Stanisicning mavsum davomidagi barqaror o‘yini hamda ularning parijliklarga qarshi o‘yinlardagi tajribasi bilan bog‘liq. Murabbiy ularga to‘liq ishonch bildirayotganini va bu futbolchilar raqib uslubini yaxshi bilishini alohida qayd etdi.
Shuningdek, Vincent Kompany Alphonso Davies o‘yin davomida zaxiradan maydonga tushishi va jamoaga yordam berishi mumkinligini istisno qilmadi. Murabbiyning fikricha, jamoaning himoya chizig‘idagi barqarorlik va tajriba hal qiluvchi pallada muhim ahamiyat kasb etadi.
Bavariya hujum chizig‘ida esa Michael Olise, Harry Kane va Luis Díaz uchligi joy olgan. Jamoa 30-may kuni Budapeshtda bo‘lib o‘tadigan final yo‘llanmasini qo‘lga kiritish uchun bor kuchini ishga solishga tayyor.
“Zamin”ni Telegramʻda oʻqing!
