Braziliyalik yarim himoyachi Kazemiro o‘z faoliyati davomida birga to‘p surgan futbolchilar ichida Garet Beylni eng mukammal o‘yinchi deb atadi. U Real Madrid safida birga o‘ynagan Krishtianu Ronalduni alohida e’tirof etsa-da, aynan uelslik futbolchining maydondagi har tomonlama foydali harakatlarini yuqori baholadi. Bu haqda Goal.com xabar beradi.
Rio Ferdinandning YouTube kanaliga bergan intervyusida Kazemiro Ronalduning gollar borasidagi ko‘rsatkichlari fenomenal ekanligini ta’kidladi. Biroq, uning fikricha, Beyl hujumda ham, himoyada ham birdek samarali harakat qilishi, boshi bilan gol ura olishi va standart vaziyatlardan unumli foydalanishi bilan ajralib turgan.
"Krishtianu — eng yaxshisi, bu borada bahs bo‘lishi mumkin emas. Ammo umumiy mahorat va har tomonlama mukammallik haqida gap ketganda, men uchun Garet Beyl birinchi o‘rinda. U juda tezkor, kuchli va maydonning har bir nuqtasida foydali edi", — dedi Kazemiro.
Garet Beyl Real Madrid safida o‘tkazgan yillarida besh marta Chempionlar ligasi g‘olibi bo‘lgan va 106 ta gol urishga erishgan. Shunga qaramay, uelslik futbolchi Ispaniyadagi faoliyatining so‘nggi yillarida muxlislar va matbuot tomonidan ko‘plab tanqidlarga uchragan edi.
“Zamin”ni Telegramʻda oʻqing!
