“Manchester Siti” Angliya kubogi finalida “Chelsi”ni 1:0 hisobida mag‘lub etib, klub tarixida sakkizinchi bor ushbu nufuzli sovrin sohibi bo‘ldi. Londonning mashhur “Uembli” arenasida o‘tgan hal qiluvchi bahs “shaharliklar” uchun yana bir tarixiy kechaga aylandi.
Finaldagi yagona gol “Manchester Siti”ga kubok taqdim etgan bo‘lsa, uchrashuvdan keyingi eng katta muhokama Abduqodir Husanov va “Chelsi” hujumchisi Joao Pedro ishtirokidagi bahsli vaziyat atrofida bo‘lmoqda.
Birinchi bo‘limda Joao Pedro “Siti” jarima maydoniga xavfli tarzda yorib kirishga urindi. Shu payt Abduqodir Husanov raqib bilan yelkama-yelka to‘qnashdi. Braziliyalik futbolchi yerga qulab tushdi va “Chelsi” futbolchilari darhol bosh hakamdan penalti talab qila boshladi.
Biroq uchrashuv bosh hakami Darren Inglend bu epizodda qoidabuzarlik ko‘rmadi. U o‘yinni davom ettirdi va hatto VAR yordamiga ham murojaat qilmadi. Aynan shu qaror finaldan keyin futbol jamoatchiligida qizg‘in bahslarga sabab bo‘ldi.
Ayrim muxlislar Husanovning harakatini qonuniy jismoniy kurash deb baholamoqda. Ularga ko‘ra, o‘zbekistonlik himoyachi raqibga imkon bermagan, ammo qoida doirasidan chiqmagan. “Chelsi” tarafdorlari va bir qator ekspertlar esa bu vaziyatda penalti belgilanishi kerak edi, degan fikrda.
Bahsli epizod haqida afsonaviy fransuz futbolchisi Terri Anri ham o‘z munosabatini bildirdi. Uning fikricha, Abduqodir Husanov Joao Pedroga qarshi qoidabuzarlik qilgan va bu holat nafaqat penalti, balki qizil kartochkaga ham tortishi mumkin edi.
Anri o‘yindan keyingi efirda vaziyatni qayta ko‘rib chiqqanini va hakam qaroriga qo‘shilmasligini aytdi. Fransiya terma jamoasining sobiq hujumchisi Husanov bu epizodda to‘p uchun o‘ynashga jiddiy urinmagan, degan fikrni ilgari surdi.
“Men takroriy lavhani yana bir bor ko‘rdim va ochig‘ini aytsam, Husanovning Joau Pedroga qarshi foli — bu toza penalti. Menimcha, u yerda hatto qizil kartochka ham berish kerak edi”, — dedi Terri Anri.
Shu bilan birga, Anri bunday vaziyatlarda ko‘plab ekspertlar ochiq fikr bildirishdan ehtiyot bo‘lishini ham ta’kidladi. Uning fikricha, ayrim mutaxassislar muxlislar, ommaviy axborot vositalari yoki futbol jamoatchiligining reaksiyasidan cho‘chib, bahsli qarorlarni keskin tanqid qilmaslikni ma’qul ko‘radi.
Bu epizod Abduqodir Husanovning Angliya futbolidagi o‘yin uslubini yana bir bor muhokama markaziga olib chiqdi. 22 yoshli himoyachi jismoniy kurashdan qochmaydi, raqibga qattiq bosim o‘tkazadi va jarima maydonida ham qat’iyat bilan harakat qiladi. Aynan shu jihatlari uni “Siti” himoyasida muhim figuraga aylantirmoqda.
Shu bilan birga, Angliya futbolida bunday o‘yin uslubi doim bahslar bilan yonma-yon yuradi. Bir tomonda himoyachining jasorati va xarakterini maqtaydiganlar bor. Ikkinchi tomonda esa u qoidabuzarlik chegarasida o‘ynamoqda, deb hisoblaydiganlar ham kam emas.
Har qanday holatda ham, natija o‘zgarmaydi: “Manchester Siti” Angliya kubogini qo‘lga kiritdi, Husanov esa jamoasi bilan mavsumdagi ikkinchi sovriniga ega chiqdi. Avvalroq u “shaharliklar” bilan Angliya liga kubogida ham zafar quchgan edi.
Eng muhim jihatlardan biri shuki, Abduqodir Husanov Angliya futbolida sovrin qo‘lga kiritgan birinchi o‘zbek futbolchisi sifatida tarixga kirdi. U nafaqat sovrinli jamoa a’zosi bo‘ldi, balki har ikki finalda ham maydonga tushib, “Manchester Siti” muvaffaqiyatiga o‘z hissasini qo‘shdi.
Bu esa o‘zbek futboli uchun katta voqea. Angliya kabi yuqori bosimli chempionatda, “Uembli” kabi sahnada final o‘ynash va sovrin ko‘tarish har qanday futbolchi uchun ulkan yutuq hisoblanadi.
Qisqasi, Husanov finalda yana diqqat markazida bo‘ldi. Kimdir uni qat’iyatli himoyachi deb maqtamoqda, kimdir esa penaltidan qutulib qoldi, demoqda. Ammo bir narsa aniq: Abduqodir Angliya futboliga shunchaki kelmadi — u yerda o‘z nomi atrofida katta bahslar boshlatish darajasiga chiqdi.
“Zamin”ni Telegramʻda oʻqing!
