Ispaniya chempioni Barselona Angliyaning Nyukasl klubi vingeri Anthony Gordon transferini rasman e’lon qildi. Kataloniyaliklar ushbu transfer poygasida Bavariya jamoasini ortda qoldirishga muvaffaq bo‘lishdi. 25 yoshli futbolchi ko‘k-anorranglilar bilan besh yillik shartnoma imzoladi. Bu haqda Goal.com xabar beradi.
Kelishuvning umumiy qiymati 80 million yevroni tashkil etadi. Barselona dastlab 70 million yevro to‘laydi, qolgan 10 million yevro esa turli bonuslar ko‘rinishida taqdim etiladi. Futbolchi payshanba kuni tibbiy ko‘rikdan o‘tish uchun Barselona shahriga yetib keldi va 2031-yilgacha mo‘ljallangan shartnomaga qo‘l qo‘ydi.
Bir necha kun avval Anthony Gordon Myunxenning Bavariya klubiga o‘tishi va u yerda Harry Kane bilan birga to‘p surishi kutilayotgan edi. Biroq Barselona sport direktori Deco Angliyaga tashrif buyurib, muzokaralar jarayonini o‘zgartirib yubordi. Mundo Deportivo nashrining xabar berishicha, jamoada Lamine Yamal kabi yulduzlar borligi va Hansi Flick loyihasi futbolchining qaroriga ijobiy ta’sir ko‘rsatgan.
Shartnoma shartlariga ko‘ra, agar Gordon o‘yinlarning 60 foizida ishtirok etsa, Nyukasl har mavsum uchun 1 million yevrodan qo‘shimcha mablag‘ oladi. Shuningdek, futbolchining sobiq jamoasi Everton ham ushbu transferdan 15 foizlik ulushga ega bo‘ladi. Ushbu transfer Nyukasl uchun katta foyda keltirishi bilan birga, klubga yangi futbolchilar sotib olish uchun moliyaviy imkoniyat yaratadi.
Transferning tezda hal etilishi Anthony Gordon uchun Jahon chempionati oldidan Angliya terma jamoasi yig‘iniga o‘z vaqtida qo‘shilish imkonini beradi. Nyukasl esa xalqaro turnirlar vaqtida yuzaga kelishi mumkin bo‘lgan jarohatlar xavfidan qutulib, o‘z transfer rejalarini erta amalga oshirishni boshladi.
“Zamin”ni Telegramʻda oʻqing!
