"Baniyas" bosh murabbiyi oʻyindan oldin nimalar dedi?

Bugun OChL oʻtish bosqichidan oʻrin olgan "Baniyas" - "Nasaf" bahsi boʻlib oʻtadi. Toshkent vaqti bilan 21:15da boshlanadigan uchrashuvda kim gʻalaba qozonsa, shu jamoa guruh oʻyinlariga yoʻl oladi. Kecha boʻlib oʻtgan matbuot anjumanida "Baniyas" bosh murabbiyi Daniel Isaila qatnashib, savollarga javob qaytardi.

Ruminiyalik murabbiy oʻz fikrlarini quyidagicha boshladi:
- Bu biz uchun muhim oʻyin boʻladi. Chunki OChL guruh bosqichiga chiqishimiz faqat shu oʻyinga bogʻliq. Chempionlar ligasida ishtirok doim iliq hissiyot beradi. "Nasaf" bilan kechadigan bahsda oʻzimizni koʻrsatish uchun bor imkoniyatni ishga solamiz. Men oʻz paytida Ruminiya U-21 terma jamoasini boshqarib yaxshi natijalarga erishganman. Endi boʻlsa OChLda ham oʻzimni koʻrsatishni xohlayman. Bu menga yangi motivatsiya beradi.

- Raqib haqida qanday fikrdasiz?
- "Nasaf"ni yaxshi oʻrganishga harakat qildik. Ularga gol urish birmuncha qiyin deb oʻylayman, chunki jamoaning himoya chizigʻi chakki emas. Qolaversa raqibni oʻrganish jarayonida tezkor futbolchilari borligiga guvoh boʻldik.

- Tarkibda yoʻqotishlar bormi?
- Bor. Asosiy himoyachimiz Hussayn Abbos jarohat olgan va oʻyinda ishtirok etishi soʻroq ostida. U himoyachi boʻlishiga qaramay 12ta gol urdi. Lekin "Nasaf" bilan bellashuvda boshqalar gol uradi deb oʻylayman. Jamoa bilan yigʻilib hammasini muhokama qildik, yigitlar oʻyinga tayyor.

- Sizningcha, "Nasaf"ning kuchsiz tomoni nimada?
- Avvalo meni oʻz jamoamning holati qiziqtiradi. Afsuski, hozirgi paytda zaxiramiz keng emas. Guruh bosqichiga chiqsak, qiynalib qolishimiz mumkin. Lekin ungacha pley-offdan oʻtishni hal qilish kerak. Yana qaytarib aytaman, biz "Nasaf"ni hurmat qilamiz, yaxshi jamoa, ammo Chempionlar ligasi guruh oʻyinlariga borishni orzu qilyapman. “Zamin” yangiliklarini “Telegram”da kuzatib boring