Donald Tramp ma'muriyati AQSh Milliy ilmiy kengashini (NSB) tarqatib yuborishga qaror qildi. Ushbu maslahat organi prezident va Kongressga Milliy ilmiy jamg'arma (NSF) faoliyati bo'yicha tavsiyalar berish uchun mas'ul edi. Bu haqda Ixbt.com xabar beradi.
Milliy ilmiy kengash ilmiy siyosatni shakllantirish va fundamental tadqiqotlarni moliyalashtirish strategiyalarini belgilashda muhim rol o'ynagan. So'nggi yillarda jamg'arma mablag' yetishmovchiligi va grantlar ajratishdagi kechikishlar bilan bog'liq muammolarga duch kelayotgan edi.
Vakillar palatasining Fan, koinot va texnologiyalar qo'mitasi a'zosi Zoi Lofgren ushbu qarorni keskin tanqid qildi. Uning so'zlariga ko'ra, kengash siyosatdan xoli organ bo'lib, uning tugatilishi AQShning global ilmiy raqobatdagi pozitsiyasini zaiflashtiradi.
Lofgren ushbu qadam ilmiy maslahat organini siyosiy sodiq shaxslar bilan almashtirishga urinish bo'lishi mumkinligidan xavotir bildirdi. Hozircha kengashning tarqatilishi sabablari bo'yicha rasmiy va batafsil tushuntirish berilmadi.
Milliy ilmiy jamg'arma o'n yillar davomida mobil telefonlar va raqamli xizmatlar kabi zamonaviy texnologiyalarning asosi bo'lgan tadqiqotlarni qo'llab-quvvatlab kelgan edi.
“Zamin”ni Telegramʻda oʻqing!
