Vengriyada so‘nggi 125 yildagi eng kuchli qurg‘oqchilik qayd etildi: Mutaxassislar xavotirda

Vengriya meteorologiya xizmati — HungaroMet bergan ma’lumotlarga ko‘ra, joriy yilning dastlabki 10 oyi davomida mamlakatda so‘nggi 125 yildagi eng kuchli va mislsiz qurg‘oqchilik qayd etildi. Bunday keskin tabiiy jarayonlar butun Markaziy va Janubiy Yevropani jiddiy tashvishga solmoqda.

1901 yildan beri kuzatilmagan quruqchilik

Meteorolog va klimat eksperti Oliver Senteshning ta’kidlashicha, tekshirilgan tarixiy ma’lumotlarga ko‘ra, Vengriya bunday kam yog‘ingarchilikni oxirgi marta 1860 yillarda boshdan kechirgan. Bunga asosiy sabab sifatida tez-tez takrorlanib turadigan antisiklonlar bulutlar hosil bo‘lishiga to‘sqinlik qilgani ko‘rsatilmoqda.

«Umuman olganda, zarur davrda mamlakat bo‘ylab 250–300 millimetr kam yog‘ingarchilik kuzatildi. Matra kabi baland tog‘li hududlarda esa defitsit hatto 400 millimetrga yetmoqda», — deydi ekspert.

Yetti Balaton ko‘li hajmidagi suv yo‘qotildi

Ushbu salbiy tendensiya bir necha yillardan buyon davom etib kelayotgani sababli, tuproqdagi suv tanqisligi halokatli darajaga yetdi. Hisob-kitoblarga ko‘ra, yo‘qotilgan namlik hajmi yettita Balaton ko‘lining miqdoriga teng. Mutaxassislarning eslatishicha, bu muammo faqatgina Vengriya bilan chegaralanib qolmasdan, butun Janubiy va Markaziy Yevropani qamrab olgan.

Milliy harakatlar rejasi

Joriy yilda Yevropani qamrab olgan kuchli qurg‘oqchilik katta moliyaviy zararlar va fojialarga olib keldi. Mazkur muammolarning oldini olish maqsadida Vengriyaning tegishli vazirliklari suv resurslarini saqlash bo‘yicha 600 betlik harakatlar rejasini taqdim etdi. Unga ko‘ra, yaqin yillarda suv boshqaruvi va infratuzilmasini yaxshilash uchun 600 million yevrodan ortiq mablag‘ sarflanishi rejalashtirilgan.

Sizningcha, global isish va kuchli qurg‘oqchilikning oldini olish uchun insoniyat qanday shoshilinch choralar ko‘rishi kerak? O‘z fikringizni izohlarda qoldiring!