Google Chrome brauzerining 147-versiyasi foydalanuvchilar uchun kutilmagan muammoni keltirib chiqardi. Brauzer hech qanday ogohlantirishsiz kompyuter xotirasiga "weights.bin" nomli 4 GB hajmli faylni yuklab olmoqda. Ushbu fayl Gemini Nano sunʼiy intellekt modelining bir qismi boʻlib, matn yozishga yordam berish, avtomatik toʻldirish va firibgarlikni aniqlash kabi funksiyalar uchun moʻljallangan. Bu haqda Ixbt.com xabar beradi.
Ushbu model bulutli xizmatlardan foydalanmasdan, toʻgʻridan-toʻgʻri foydalanuvchi qurilmasida ishlaydi. Bu maxfiylik nuqtayi nazaridan ijobiy boʻlsa-da, xotirasi cheklangan kompyuterlar uchun jiddiy muammo tugʻdiradi. Fayl foydalanuvchi profilidagi "OptGuideOnDeviceModel" papkasida saqlanadi va uni shunchaki oʻchirib tashlash kifoya qilmaydi, chunki brauzer sozlamalari oʻzgartirilmasa, u qaytadan yuklanib qolishi mumkin.
Google ushbu funksiyalar uchun qancha xotira talab qilinishi haqida aniq maʼlumot bermayapti. Foydalanuvchilar ushbu modelni butunlay oʻchirish uchun brauzer sozlamalaridagi "On-Device AI" opsiyasini oʻchirib qoʻyishlari kerak. Kompaniya kelajakda brauzer yangilanishlari bilan model hajmi oʻzgarishi mumkinligini taʼkidlamoqda.
Mutaxassislar Google kompaniyasini foydalanuvchilarni bunday katta hajmdagi fayllar haqida oldindan xabardor qilishga va ularga tanlov imkoniyatini taqdim etishga chaqirmoqda. Agar foydalanuvchilarga bulutli modellardan foydalanish yoki mahalliy modelni oʻrnatish tanlovi berilganda, bunday tushunmovchiliklarning oldini olish mumkin edi.
“Zamin”ni Telegramʻda oʻqing!
