Robinhood bosh direktori Vlad Tenev kompaniyaning yangi Ventures Fund I loyihasi muvaffaqiyatli o‘tganini ma’lum qildi. Ushbu fond oddiy investorlarga Stripe, Oura, Databricks va OpenAI kabi yirik xususiy texnologik kompaniyalarga sarmoya kiritish imkonini beradi. Nyu-York fond birjasida (NYSE) ro‘yxatdan o‘tgan ushbu fond orqali 150 mingdan ortiq xususiy investorlar IPO jarayonida ishtirok etdi. Bu haqda Techcrunch.com xabar beradi.
Tenevning so‘zlariga ko‘ra, bugungi kunda "yakkashox" (unicorn) atamasi o‘z ahamiyatini yo‘qotmoqda. OpenAI va Anthropic kabi sun’iy intellekt kompaniyalari yuzlab milliard dollarlik baholanishga erishayotgani sababli, ularni "chegara kompaniyalari" (frontier companies) deb atash to‘g‘riroq. Uning fikricha, ko‘plab kompaniyalar birja chiqquniga qadar trillion dollarlik qiymatga yetishi mumkin.
Yangi fond Robinhood’ning bozorlarni demokratlashtirish missiyasining mantiqiy davomi hisoblanadi. Ilgari kompaniya komissiyasiz savdolar orqali ommaviy bozorlarda ishtirokni oshirgan bo‘lsa, endilikda xususiy kompaniyalarga sarmoya kiritish imkoniyatini taqdim etmoqda. Bu fond kunlik likvidlikka ega va an’anaviy venchur fondlaridan farqli o‘laroq, foydadan ulush (carry) talab qilmaydi.
Tenev oddiy investorlar IPO’ni kutmasdan, kompaniyalarning rivojlanish jarayonida erta bosqichda qatnashishi kerakligiga ishonadi. Uning maqsadi — kelajakda startaplar ilk kapitalni jalb qilayotgan vaqtdayoq oddiy investorlarga ham imkoniyat yaratish va ularning xususiy bozorlardagi o‘sishdan foyda olishini ta’minlashdir.
“Zamin”ni Telegramʻda oʻqing!
