Robinhood kompaniyasi oʻzining birinchi venchur fondini fond bozoriga chiqarganidan atigi ikki oy oʻtib, ikkinchi fondni tayyorlamoqda. Kompaniya RVII deb nomlangan yangi fond uchun maxfiy roʻyxatdan oʻtish hujjatlarini topshirdi. Birinchi fonddan farqli oʻlaroq, u Airwallex, Databricks, OpenAI va Stripe kabi kompaniyalarga sarmoya kiritgan boʻlsa, yangi fond oʻz doirasini kengaytirib, erta va oʻsish bosqichidagi startaplarga eʼtibor qaratadi. Bu haqda Techcrunch.com xabar beradi.
Robinhoodʼning birinchi fondi (RVI) mart oyida NYSE birjasida 21 dollardan sotuvga chiqqan edi. Hozirda uning aksiyalari 43 dollardan oshib ketdi, bunga asosan fond tarkibidagi startaplarning sunʼiy intellekt sohasidagi muvaffaqiyatlari sabab boʻlmoqda. Yangi fond ham xuddi shunday strategiyani davom ettirib, oddiy investorlarga xususiy kompaniyalarga sarmoya kiritish imkonini beradi.
AQSh qonunchiligiga koʻra, xususiy kompaniyalarga sarmoya kiritish odatda faqat boy investorlar uchun ochiq. Robinhood esa bu cheklovni olib tashlab, har qanday foydalanuvchiga brokerlik hisobvaragʻi orqali venchur investitsiyalar qilish imkonini yaratmoqda. Kompaniya rahbari Vlad Tenevning soʻzlariga koʻra, bu fondlar kundalik likvidlikka ega boʻlib, anʼanaviy venchur fondlaridan farqli ravishda foydadan ulush olmaydi.
Tenevning uzoq muddatli qarashlari startaplarni moliyalashtirish tizimini tubdan oʻzgartirishga qaratilgan. Uning fikricha, startaplar oʻzlarining eng dastlabki bosqichlarida ham oddiy investorlardan mablagʻ jalb qilishi kerak. Bu esa oddiy odamlarga kompaniyalarning oʻsish jarayonidan foyda koʻrish imkonini beradi, garchi bu yuqori xavf bilan bogʻliq boʻlsa ham.
“Zamin”ni Telegramʻda oʻqing!
