Janubiy Koreyada texnologiya va diniy an’analar uyg‘unlashgan noodatiy voqea yuz berdi. Maxsus marosim orqali robot buddistlar jamoasiga qabul qilinib, unga “Gabi” nomi berildi. Bu haqda Yonhap axborot agentligi ma'lum qildi.
Marosim Joge Order buddist ordenida tashkil etilgan. Seulda bo‘lib o‘tgan tadbir davomida inson-rohib robotga muqaddas ta’limotga sodiq qolishga tayyormi yoki yo‘qligi haqida savol bergan. Robot esa bunga ijobiy javob qaytargan.
Shundan so‘ng ruhoniy ustoz robot uchun maxsus moslashtirilgan beshta buddist qoidasini tushuntirib bergan. Ushbu tamoyillar orasida hayotga zarar yetkazmaslik, boshqa robotlarga ziyon qilmaslik, insonlarga bo‘ysunish, yolg‘on gapirmaslik hamda energiyani tejab ishlatish kabi qoidalar bor.
Marosim davomida “Gabi” rohiblarga ta’zim qilgan, tasbeh qabul qilgan va maxsus rohib kiyimini kiygan holda ishtirok etgan. An’anaviy marosimdagi ayrim urf-odatlar robot uchun zamonaviy shaklda moslashtirilgan.
Orden vakillarining aytishicha, robotga berilgan “Gabi” nomi talaffuzi oson va Budda mehr-shafqatini ifodalovchi ma’noga ega. Ruhoniy Son Vonning fikricha, robot uchun ishlab chiqilgan ushbu qoidalar kelajakda inson va sun’iy intellekt o‘rtasidagi uyg‘un hayotning asosiga aylanishi mumkin.
Ma’lum qilinishicha, Gabi yaqin kunlarda ibodatxonada “faxriy rohib” sifatida faoliyat boshlaydi. Shuningdek, u Budda tavalludiga bag‘ishlangan lotus chiroqlari festivalida yana uchta robot bilan birga qatnashishi rejalashtirilgan.
