Florida jaziramasida o‘tgan F1 poygalari nafaqat tezlik va adrenalin, balki yirik sarmoyadorlar va startap asoschilari uchun bitimlar tuziladigan asosiy maydonga aylandi. Poyga avtomobillari trassada g‘alaba uchun kurashayotgan bir paytda, paddoklarda biznes muzokaralari qizg‘in davom etmoqda. So‘nggi yillarda F1 musobaqalari shunchaki sport tadbiri emas, balki texnologiya olami vakillari uchun eng nufuzli uchrashuv joyiga aylandi. Bu haqda Techcrunch.com xabar beradi.
Tadbir doirasida tashkil etiladigan kechki ziyofatlar, kokteyl partilari va norasmiy uchrashuvlar biznes va dam olishni uyg‘unlashtirib, investorlar uchun qulay muhit yaratmoqda. Ko‘plab venchur fondlari o‘z mijozlarini aynan shu yerda kutib olib, yangi hamkorliklar o‘rnatishmoqda. Hatto ba’zi tadbirkorlar poygani tomosha qilishdan ko‘ra, aynan shu yondosh tadbirlarda qatnashishni ustun qo‘ymoqda.
F1 jamoalari avvallari neft va tamaki kompaniyalari homiyligida faoliyat yuritgan bo‘lsa, bugungi kunda ularning avtomobillarida Oracle, Microsoft, AWS, Anthropic va IBM kabi texnologiya gigantlarining logotiplarini ko‘rish mumkin. Bu o‘zgarish so‘nggi besh yil ichida texnologiya sektori va sport o‘rtasidagi bog‘liqlik qanchalik kuchayganini yaqqol ko‘rsatadi.
Netflix’ning "Drive to Survive" seriali tomoshabinlar qiziqishini oshirgan bo‘lsa, sun’iy intellekt va bulutli texnologiyalar kompaniyalarining kirib kelishi sportning biznes salohiyatini yangi bosqichga olib chiqdi. Lightspeed Ventures kabi yirik fondlar ham o‘z startaplari uchun aynan shu yerda yangi mijozlar va hamkorlar izlamoqda.
“Zamin”ni Telegramʻda oʻqing!
