Bugungi kunda Serebras Systems kompaniyasi OpenAI va AWS kabi texnologiya gigantlari uchun sun’iy intellekt chiplarini yetkazib beruvchi ommaviy kompaniyaga aylandi. Payshanba kuni o‘tkazilgan muvaffaqiyatli IPO jarayonidan so‘ng kompaniya qiymati 60 milliard dollarga yetdi va uning asoschilari milliarderga aylanishdi. Biroq 2019-yilda, kompaniya tashkil etilganiga atigi uch yil bo‘lganida, u bankrotlik yoqasiga kelib qolgan edi. Bu haqda Techcrunch.com xabar beradi.
Kompaniya bosh direktori Andrev Feldman TechCrunch nashriga bergan intervyusida o‘sha davrda har oyda 8 million dollar mablag‘ sarflaganliklarini va texnik muammoni hal qilish uchun jami 200 million dollarga yaqin mablag‘ni yo‘qotganliklarini esladi. Feldman har safar direktorlar kengashi yig‘ilishiga navbatdagi muvaffaqiyatsizlik va sarflangan katta mablag‘lar haqida hisobot berishga majbur bo‘lgan.
Serebras g‘oyasi qog‘ozda oddiy ko‘ringan: yarimo‘tkazgichlar sanoati 50 yildan ortiq vaqt davomida tranzistorlarni kichikroq bo‘laklarga bo‘lish orqali protsessorlarni tezlashtirishga harakat qilgan. Biroq sun’iy intellekt uchun zarur bo‘lgan ulkan hisoblash quvvati ko‘plab chiplarni bir-biriga ulashni talab qilardi. Serebras asoschilari esa butun kremniy plastinasini bitta ulkan va qudratli chipga aylantirish g‘oyasini ilgari surishdi.
Ushbu g‘oyani amalga oshirishda eng katta to‘siq "qadoqlash" jarayoni bo‘ldi. TSMC bilan hamkorlikda ishlab chiqarilgan mega-chiplarni ona plataga o‘rnatish, ularni quvvat bilan ta’minlash hamda sovutish tizimlarini yaratish oson kechmadi. Feldman ta’kidlashicha, ularning chiplari odatdagidan 58 barobar katta bo‘lib, 40 barobar ko‘proq energiya talab qilgan va bu muammoni hal qilish uchun bozorda tayyor yechimlar mavjud emas edi.
“Zamin”ni Telegramʻda oʻqing!
