Sunʼiy intellekt chiplari ishlab chiqaruvchi Cerebras kompaniyasi oʻz IPO jarayonida 5,5 milliard dollar mablagʻ toʻpladi. Aksiyalar narxi dastlabki kutilmalardan yuqori — 185 dollar etib belgilandi, garchi kompaniya avvaliga 115-125 dollar, keyinroq esa 150-160 dollar atrofida narx belgilashni rejalashtirgan edi. Ushbu bitim natijasida kompaniyaning umumiy qiymati 56,4 milliard dollarga yetdi. Bu haqda Techcrunch.com xabar beradi.
Kompaniya asoschilari Endryu Feldman va Shon Li katta boylikka ega boʻlishdi. Bir yil avval Cerebras uchun bu natija imkonsizdek koʻringan edi. NVIDIA kompaniyasining raqobatchisi hisoblangan Cerebras 2024-yilda IPOga chiqishga uringan, biroq Abu-Dabining Group 42 kompaniyasi bilan bogʻliq tekshiruvlar va moliyaviy muammolar tufayli bu rejalar toʻxtatib qoʻyilgan edi.
2025-yilda vaziyat tubdan oʻzgardi: Cerebras oʻz daromadini 510 million dollargacha yetkazib, 76 foizlik oʻsishni qayd etdi. Kompaniya avvalgi yillardagi katta zararlardan qutulib, 237,8 million dollar sof foyda koʻrishga muvaffaq boʻldi. Bu muvaffaqiyat investorlarning ishonchini qaytardi.
Bugungi kunda Cerebras sunʼiy intellekt modellarini qayta ishlash (inference) uchun chiplar yetkazib beruvchi asosiy oʻyinchilardan biriga aylandi. Kompaniyaning mijozlari qatoriga OpenAI, G42, Muhammad bin Zayd nomidagi Sunʼiy intellekt universiteti va Amazon Web Services kabi yirik tashkilotlar kiradi.
“Zamin”ni Telegramʻda oʻqing!
