Hakamlar hay'atining Elon Musk tomonidan OpenAI asoschilari va Microsoft kompaniyasiga qarshi ochilgan da'voni rad etishi sud jarayonida kuzatilgan holatlarni tasdiqladi: Muskning da'vosi yetarli asosga ega emas edi. Sud jarayonida OpenAI advokatlari qonun o‘z mijozlari tomonida ekanligini nuqtama-nuqta isbotlab berishdi, Musk esa sud qaroridan norozi bo‘lib, hakamni keskin tanqid qildi va apellyatsiya berishini e'lon qildi. Bu haqda Techcrunch.com xabar beradi.
Sud jarayoni davomida nafaqat Sam Altman, balki Elon Muskning o‘zi haqida ham kutilmagan ma'lumotlar oshkor bo‘ldi. Greg Brockman 2017-yilda Musk OpenAI tadqiqotchilarini Tesla shtab-kvartirasiga avtopilot tizimini yaxshilash uchun jalb qilganini ma'lum qildi. Bu jarayonda Andrej Karpathy, Ilya Sutskever va Scott Grey kabi yetakchi olimlar Tesla xodimlariga bepul yordam berishgan.
Ma'lum bo‘lishicha, Tesla ushbu xizmatlar uchun OpenAI kompaniyasiga hech qanday to‘lov qilmagan. Muskning da'vosi asosan Altman va Brockman xayriya mablag‘larini o‘z manfaatlari yo‘lida ishlatganlikda ayblashga qaratilgan edi. Biroq, ekspertlarning fikricha, Muskning o‘zi ham xayriya tashkiloti resurslarini o‘zining tijoriy loyihasi bo‘lgan Tesla uchun yo‘naltirgani bu ayblovlarni shubhali qilib qo‘ymoqda.
Kolumbiya huquq maktabi professori Dorothy Lundning ta'kidlashicha, Muskning xayriya mablag‘larini o‘z kompaniyasi manfaatlariga yo‘naltirishi qonuniy emas. Bu holat sud jarayonida Muskning o‘zini ham xuddi o‘zi ayblagan ishda aybdor qilib ko‘rsatdi va uning da'vosini ma'naviy jihatdan zaiflashtirdi.
“Zamin”ni Telegramʻda oʻqing!
