Dasturiy taʻminot giganti Intuit oʻz resurslarini sunʻiy intellekt (AI) texnologiyalarini rivojlantirishga yoʻnaltirish maqsadida xodimlarining 17 foizini yoki taxminan 3000 kishini ishdan boʻshatmoqda. Kompaniya bosh direktori Sasan Goodarzi tomonidan yuborilgan ichki eslatmada aytilishicha, ushbu qisqartirishlar korporativ tuzilmani soddalashtirish va AI loyihalariga koʻproq eʻtibor qaratishga xizmat qiladi. Bu haqda Techcrunch.com xabar beradi.
TurboTax, QuickBooks va Credit Karma kabi moliya va soliq dasturlari bilan tanilgan Intuit kompaniyasida 2025-yil iyul holatiga koʻra 18 200 nafar xodim faoliyat yuritayotgan edi. Hozircha kompaniya rahbariyati, jumladan, yillik daromadi 36,8 million dollarni tashkil etuvchi Goodarzi oʻz maoshini kamaytirishi yoki yoʻqligi haqidagi savollarga javob bermadi.
Texnologiya sohasi uchun joriy yil ancha ogʻir kelmoqda. Statista maʻlumotlariga koʻra, yil boshidan beri sohada 100 000 dan ortiq ish oʻrni qisqartirildi. Amazon, Microsoft, Meta va Oracle kabi gigantlar ham AI loyihalarini moliyalashtirish uchun minglab xodimlarni boʻshatib, oʻz tashkilotlarini qayta qurishmoqda.
Qizigʻi shundaki, ushbu kompaniyalarning aksariyati AI mahsulotlariga boʻlgan yuqori talab tufayli kuchli daromad va foyda haqida hisobot berishgan. Biroq, Intuit aksiyalari soʻnggi 12 oy ichida S&P 500 indeksidan ortda qolmoqda. Investorlar anʻanaviy dasturiy taʻminot xizmatlari (SaaS) yangi AI texnologiyalari bilan raqobatda yutqazib qoʻyishidan xavotirda.
Moliyaviy koʻrsatkichlarga koʻra, Intuit ikkinchi chorakda 4,65 milliard dollar daromad koʻrgan, bu oʻtgan yilga nisbatan 17 foizga koʻpdir. Sof foyda esa 48 foizga oshib, 693 million dollarni tashkil etdi. Kompaniya uchinchi chorakda ham daromadning 10 foizga oʻsishini kutmoqda.
“Zamin”ni Telegramʻda oʻqing!
