Jeff Bezos va LA Dodgers egasi Mark Walter tomonidan qoʻllab-quvvatlanayotgan Slate Auto startapi 24-iyun kunidan boshlab oʻzining arzon elektromobillari uchun rasman buyurtmalar qabul qilishini eʼlon qildi. Kompaniya joriy yilning oxirida ilk yetkazib berishlarni amalga oshirishni rejalashtirmoqda. Payshanba kuni potensial xaridorlarga yuborilgan xabarlarda, navbatda oldinroq turish uchun hozirdanoq bron qilish tavsiya etilgan. Bu haqda Techcrunch.com xabar beradi.
Slate Auto hozircha oʻz elektromobilining yakuniy narxini ochiqlamadi, biroq iyun oyi davomida narxlar boʻyicha aniq maʼlumot berilishini vaʼda qilgan. Toʻrt yillik tarixga ega kompaniya 2025-yil aprel oyida oʻzining sodda, arzon va mijoz xohishiga koʻra oʻzgartirilishi mumkin boʻlgan transport vositasi loyihasini taqdim etgan edi. Dastlab bazaviy model narxi 20 000 dollardan past boʻlishi kutilgan edi, ammo soliq imtiyozlari bekor qilingach, narxlar 20 000 dollar oʻrtalarida boʻlishi taxmin qilinmoqda.
Oddiy konstruksiya, mexanik oynalar va boʻyoqsiz korpus gʻoyasi isteʼmolchilarda katta qiziqish uygʻotdi. Hozirgacha 160 000 dan ortiq mijoz 50 dollarlik qaytariladigan toʻlov orqali bronni amalga oshirgan. Biroq, boshqa EV startaplari tajribasi shuni koʻrsatadiki, bron qilganlarni haqiqiy xaridorga aylantirish oson kechmaydi. Shu sababli, mart oyida Amazon Marketplace sobiq vitse-prezidenti Peter Faricy kompaniyaning yangi CEO lavozimiga tayinlandi.
Kompaniya elektromobillarni ishlab chiqarish va yetkazib berish kabi murakkab vazifani bajarish uchun jiddiy moliyaviy resurslarni jalb qilgan. Aprel oyida Slate Auto 650 million dollarlik C seriyali investitsiya raundini yakunladi va umumiy jalb qilingan mablagʻ miqdori 1,4 milliard dollarga yetdi. Mablagʻlarning asosiy qismi Mark Walterning TWG Global firmasi tomonidan ajratilgan boʻlsa-da, Jeff Bezos ham loyihaning dastlabki investorlaridan biri hisoblanadi.
“Zamin”ni Telegramʻda oʻqing!
