Ruminiyada qirq yildan ortiq tanaffusdan so‘ng moxov kasalligi yana qayd etildi. Mamlakatda ushbu kasallik ikki nafar shaxsda aniqlangani rasman tasdiqlandi.
Ruminiya Sog‘liqni saqlash vazirligi ma’lum qilishicha, Reuters va European Pravda axborotlariga ko‘ra, shimoli-g‘arbiy Kluj shahrida joylashgan kurortda faoliyat yurituvchi 21 va 25 yoshli ikki massajchiga moxov kasalligi tashxisi qo‘yilgan. Hozirda ular shifokorlar nazorati ostida davolanmoqda. Shu bilan birga, yana ikki nafar shaxs ehtimoliy yuqish holatini istisno etish maqsadida tekshiruvdan o‘tkazilmoqda.
Sog‘liqni saqlash vaziri A. Rogobete bu vaziyat bo‘yicha izoh berib, aholini xotirjam bo‘lishga chaqirdi. Uning ta’kidlashicha, moxov kasalligi oson yuqmaydi va uni yuqtirish uchun uzoq muddatli hamda yaqin aloqa zarur. Vazir, shuningdek, bemorlardan birining yaqinda Osiyo davlatlaridan qaytganini, u yerda esa bir oy davomida kasalxonada davolangan onasi bilan birga bo‘lganini ma’lum qildi.
Hodisa yuzasidan barcha holatlarga oydinlik kiritilgunga qadar kurort faoliyati vaqtincha to‘xtatildi. Qayd etilishicha, Ruminiyada moxov kasalligi bo‘yicha oxirgi rasmiy tasdiqlangan holat bundan 44 yil avval kuzatilgan edi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
