Ўзбекистонда 1 июндан бошлаб жорий этилган йўл ҳаракати қоидаларини бузганлик учун жарима баллари тизими дастлабки 5 ой мобайнида сезиларли натижалар кўрсатди. Йўл ҳаракати хавфсизлиги хизматининг маълум қилишича, ушбу чоралар ҳайдовчиларнинг интизомини оширишга ва йўлларда авариялар сонини камайтиришга ижобий таъсир кўрсатган.
Расмий статистикага кўра, Йўл ҳаракати хавфсизлиги хизмати матбуот хизмати раҳбари Зоир Йўлдошевнинг билдиришича, июн ойидан октябр охиригача 114 мингдан ортиқ ҳайдовчига жарима баллари белгиланган. Уларнинг аксарияти, яъни 114 374 нафари, 1 дан 5 баллгача жарима олган.
Шу билан бирга, камроқ ҳайдовчилар орасида жиддийроқ ҳолатлар қайд этилган: 6 ҳайдовчи 5-6 балл, 2 ҳайдовчи эса 7 ва 8 балл олган. Таҳлилларга кўра, ушбу даврда йўл-транспорт ҳодисалари сони 6,3 фоизга камайган.
Айниқса, ҳайдовчилар айби билан содир бўлган авариялар 31,2 фоизга камайиши янада ижобий натижа сифатида қайд этилган.
"Ушбу рақамлар жарима баллари тизими амалий натижа берганини кўрсатмоқда. Чунки тизим жорий этилишидан олдин бундай ижобий ўзгаришлар кузатилмаган эди", - деди Зоир Йўлдошев.
Июндан августгача бўлган уч ойлик даврда ҳам йўл ҳаракати қоидабузарликлари сони ўтган йилнинг худди шу даврига нисбатан 41-58 фоизга камайгани кузатилган.
Ҳозирда баллар фақат Йўл ҳаракати хавфсизлиги хизмати ходимлари тузган баённомалар асосида белгиланмоқда. Бироқ тизим ривожлантирилмоқда.
2026 йил 1 апрелдан иккинчи босқич бошланиши кутилмоқда, бу босқичда автоматлаштирилган техник воситалар ёрдамида аниқланган қоидабузарликлар учун онлайн режимда жарима баллари белгиланади. Янги босқичнинг муҳим жиҳати жавобгарликни тақсимлаш механизми бўлади.
Агар қоидабузарлик камера орқали аниқланса, жарима баллари автомобил эгасига эмас, балки қоидабузарлик содир этилган вақтда автомобилни бошқарган шахсга топширилади. Бу жараён ишончнома, суғурта полиси ёки йўл варақаси асосида амалга оширилади.
Ҳайдовчини аниқлаш ва балларни ўтказиш учун Йўл ҳаракати хавфсизлиги хизматининг махсус мобил иловаси жорий қилинади. Илова ишлаш тартиби ҳақида қўшимча маълумот берилади.
