Конгресс Байденга импичмент эълон қилиш бўйича суриштирув бошлади

^{Кевин Маккарти Фото: SCANPIX/AP}

АҚШ Конгресси Вакиллар палатаси спикери республикачи Кевин Маккарти Вакиллар палатаси қўмиталарига АҚШнинг амалдаги президенти Жо Байденга қарши импичмент жараёни доирасида суриштирув бошлашни топширди, деб хабар беради AFP 12 сентябр, сешанба куни.

Топшириқ президентнинг ўғли Хантер Байден бизнеси билан боғлиқ. Маккарти сўзларига кўра, Жо Байден ўғлининг хориждаги бизнес фаолияти ҳақида билмаслиги ҳақида жамоатчиликка «ёлғон гапирган». «Палатадаги республикачилар президент Байденнинг хатти-ҳаракати ҳақида жиддий ва ишончли айбловларни фош қилди. Бу айбловлар умумий коррупция маданиятини тасвирлайди», - деди Маккарти.

Республикачилар етакчиси Байденга нисбатан суриштирув расмий бошланишини Вакиллар палатасига «барча фактлар ва жавобларни» тўплаш имконини берадиган «кейинги мантиқий қадам» деб атади.

Оқ уй суриштирувни «экстремал сиёсат» деб атади

Байденга нисбатан суриштирув бошлангани эълон қилингач, Оқ уй бу «энг ёмон ҳолатдаги экстремал сиёсат» эканлигини ва республикачиларда процедурани бошлаш учун зарур далиллар йўқлигини билдирди.

Республикачилар Хантер Байденни отасининг ўтмишда президент Барак Обама даврида вице-президентлик лавозимидан Украина ва Хитойда бизнес юритишда фойдаланганликда айблади. Шу билан бирга, Axios порталининг қайд этишича, Маккарти Байденга нисбатан эҳтимолий импичментни тасдиқлаш учун қуйи палатадаги 218 нафар қонун чиқарувчининг қўллаб-қувватлашига эриша оладими ёки йўқми, ҳозирча аниқ эмас. Сенатдаги баъзи республикачилар аллақачон конгрессменлар томонидан тақдим этилган далилларни бунинг учун етарли деб ҳисобламаслигини айтган, дея таъкидлайди Axios.

Янгиликлар