Зеленский шиддатли жанглар кетаётган Купянскка борди

^{Фото: Reuters}
19 февраль куни Украина президенти Владимир Зеленский Харьков вилоятининг Купянск ҳудудидаги фронт мудофаа позицияларига ташриф буюрди ва жанг майдонидаги вазият билан танишди. Бу ҳақда Украина нашрлари тарқатган хабарларга асосланиб, CNN хабар берди.

Хабарда айтилишича, Украина раҳбари Купянскда ҳудудни ҳимоя қилаётган 14-алоҳида механизациялаштирилган бригада командири подполковник Олексий Трубников билан учрашган. Учрашувда фронт чизиғидаги оператив вазият, қўшни бўлинмалар билан ўзаро алоқалар, дронлардан фойдаланиш тажрибаси, Россиянинг учувчисиз учиш аппаратлари ҳамда электрон уруш тизимларига қарши курашиш бўйича тафсилотлар муҳокама қилинган.

Украина етакчиси, шунингдек, қўшинлардаги техника ҳолати, ўқ-дори ва бошқа шошилинч эҳтиёжлар бўйича вазият ҳақида генераллардан маълумот сўраган. Суҳбат сўнгида Зеленский аскарларга Украинани ҳимоя қилаётганлари учун миннатдорлик билдирган.

Россия айни дамда Украина ҳарбийларига бой берилган ҳудудларни қайтариб олиш учун Купянск томон интилмоқда. Купянск шаҳри ва Харьков вилоятининг шарқий зоналари 2022 йил февралидан 2022 йил сентябрига қадар Россия кучлари томонидан ишғол қилинган. Кейинчалик Украина ҳарбийлари қарши ҳужум уюштириб, ҳудудни қайтариб олган эди. “Замин” янгиликларини “Telegram”да кузатиб боринг