Белград Киевга яқинлашяптими? Вучич Украинага сафар қилди

Сербия президенти Александр Вучич 11 июн куни Россиянинг Украинага босқини бошланганидан бери илк расмий ташрифи билан Украинага етиб келди, деб хабар берди Сербия раҳбарияти матбуот хизмати. Президентнинг ташрифи Одессада ўтказилган Украина – Жануби-Шарқий Европа саммитида иштирок этиш мақсадида амалга оширилди. Бир кунлик сафар аввалдан эълон қилинмаган ва яқин доирадагина амалга оширилган.

Саммит доирасида Александр Вучич Сербия томонидан Украинага бир ёки иккита шаҳар ёки ҳудудни тиклашда ёрдам бериш таклифини билдирди. Шу орқали Белград расмий Киевга нисбатан ўзининг ҳамдардлик ва қўллаб-қувватлаш позициясини очиқ кўрсатди. Вучич, шунингдек, Сербия Украина ҳудудий яхлитлигини қўллаб-қувватлашда давом этаётганини таъкидлади.

Украина президенти Володимир Зеленскийнинг матбуот хизмати тарқатган маълумотга кўра, Одессадаги саммит асосан Қора денгиздаги хавфсизлик, энергетика ва минтақавий ҳамкорлик масалаларига бағишланган. Тадбирда бир қатор минтақавий етакчилар ҳам иштирок этди: Молдова президенти Майя Санду, Греция бош вазири Кириакос Мицотакис, Хорватия бош вазири Андрей Пленкович ва Руминиянинг яқинда сайланган янги президенти Никушор Дан, у Украинага илк расмий ташрифини амалга оширди.

Александр Вучичнинг ташрифи халқаро майдонда катта қизиқиш уйғотди. Чунки Сербия Россиянинг Украинага қарши урушдаги ҳаракатларини расман қораламаган давлатлардан бири ҳисобланади. Гарчи Белград Москва томонидан Украина ҳудудларининг аннексия қилинишини тан олмаса-да, Европа Иттифоқи аъзолигига номзод сифатида Россияга қарши санкциялар жорий этишдан бош тортаётган ягона Европа давлатларидан бири саналади.

Шу билан бирга, Вучичнинг май ойида Москвага қилган сафари Европа Иттифоқи раҳбарларининг танқидларига сабаб бўлган эди. У ўша ерда Иккинчи жаҳон урушидаги ғалабанинг 80 йиллиги муносабати билан ўтказилган тантанали тадбирларда иштирок этган.

Александр Вучич 2017 йилдан буён Сербия президенти лавозимида фаолият юритиб келмоқда. Унинг Украинага қилган кутилмаган ташрифи Белграднинг ташқи сиёсий юзланиши янги босқичга киргани ҳақидаги фикрларни кучайтирмоқда. Бу ташриф, шунингдек, Сербиянинг Европа Иттифоқи йўлидаги ҳаракатларини тезлаштиришга бўлган ҳаракат сифатида ҳам баҳоланмоқда.

Бир кунлик, аммо аҳамиятли учрашувлар билан тўлган Одесса сафарининг натижалари нафақат Киев, балки Брюссель ва Москвада ҳам диққат билан кузатилмоқда.