АҚШ апелляция суди Доналд Трамп жорий қилган глобал тарифларнинг аксариятини ноқонуний деб топди. Улар АҚШ савдо қиладиган деярли барча давлатларга нисбатан қўлланилган эди. Суд қарорига кўра, президент бу борада ўз ваколатларини ошириб юборган.
Тарифлар 1977 йилда қабул қилинган Фавқулодда иқтисодий ваколатлар қонунига асосланган эди. Аммо суд бу қонун президентга бож ёки солиқлар жорий этиш ҳуқуқини бермаслигини айтди. Шу боис Трампнинг “савдо мувозанати миллий хавфсизликка таҳдид” деган далили рад этилди.
Шунга қарамай, тарифлар 14-октабргача кучда қолади. Кейин улар фақат АҚШ Олий суди бошқа қарор чиқарган тақдирда сақланиб қолиши мумкин. Энди масала Олий судда кўриб чиқилиши кутилмоқда.
Мутахассислар бу қарор АҚШ иқтисодиёти ва жаҳон бозорига таъсир қилиши мумкинлигини айтмоқда. Чунки кўплаб давлатлар қарор натижасини кутиб, АҚШ билан савдода эҳтиёткор бўлиши мумкин. Бу эса иқтисодий фаолликни пасайтиради.
Агар Олий суд апелляция қарорини тасдиқласа, Трамп сиёсатининг асосий қисми катта зарба олади. Агар қарор бекор қилинса, у президентлик ваколатларидан янада кенгроқ фойдаланиши мумкин бўлади. Шу сабабли бу масала АҚШ сиёсати ва халқаро савдо учун жуда муҳим бўлиб турибди.
«Замин»ни Telegram’да ўқинг!
