Афғонистонда «Толибон» ҳаракати 28 сентябрь, якшанба куни Америка фуқароси Амир Амирий озод этилганини маълум қилди. Озод қилинган шахс АҚШ президентининг гаровдаги шахслар масалалари бўйича вакили Адам Белер қўлига топширилди.
Маълумотларга кўра, шу ой бошларида Вашингтон вакиллари «Толибон» билан эҳтимолий маҳбуслар алмашинуви юзасидан музокара олиб борган.
Амирийнинг қандай шароитда қўлга олингани ҳақида аниқ маълумот йўқ. Манбаларнинг таъкидлашича, у 2024 йил декабридан бери сақланиб келинган. Эркинликка чиққанидан сўнг, Амирий уйига йўл олди ва Қатар пойтахти Доҳада тиббий кўрикдан ўтди.
АҚШ давлат котиби Марко Рубио ушбу жараёнда кўрсатилган ёрдами учун Қатар ҳукуматига миннатдорлик билдирди. Шунингдек, у президент Дональд Трампнинг қуйидаги сўзларини эсга олди: «Бирорта америкалик ноҳақ равишда хорижда ушлаб турилса, биз уни уйига қайтармагунча тўхтамаймиз».
“Zamin”ни Telegram'да ўқинг!
